"Қайрат" қақпашысы Шерхан Қалмұрзаның "Реалға" қарсы ойыны кезекті рет Чемпиондар лигасының үздік сейвтері қатарына енді, - деп хабарлайды Aqshamnews.kz тілшісі.
Алматылық "Қайраттың" 18 жастағы қақпашысы Шерхан Қалмұрзаның керемет сейві UEFA Чемпиондар лигасының екінші турының алғашқы ойын күніндегі үздік төрт құтқарудың қатарына кірді. Бұл туралы УЕФА ЛЧ-ның ресми парақшасында жариялады.
Қалмұрза мадридтік "Реалдың" жұлдызы Килиан Мбаппенің жойқын соққысын қайтарған сәтімен ерекшеленді.
ТОП-4 үздік сейв
Шерханнан бөлек, үздік төрттікке "Галатасарай" қақпашысы Угурджан Чакыр ("Ливерпульге" қарсы ойындағы сейві үшін), "Челси" қақпашысы Роберт Санчес ("Бенфикамен" кездесу), сондай-ақ "Аякс" қақпашысы Витезслав Ярош ("Марсельге" қарсы ойыны үшін) енді.
Қалмұрза екінші рет үздіктер қатарында
Айта кетейік, Шерхан Қалмұрза Чемпиондар лигасының үздік қақпашылары тізіміне алғаш рет еніп отырған жоқ. Бұған дейін "Спортингпен" өткен кездесудегі ойыны үшін де УЕФА жас қақпашыны атап өткен.
Жанкүйерлер саны күрт өсті
"Реалға" қарсы Алматыда өткен ойыннан кейін Шерхан Қалмұрзаның Instagram парақшасына 100 мыңнан астам жаңа жазылушы қосылды.