9 наурызда кешке Ресей президенті Владимир Путин мен АҚШ президенті Дональд Трамп телефон арқылы сөйлесті, – деп хабарлайды aqshamnews.kz тілшісі.
Бұл туралы журналистерге Ресей президентінің халықаралық мәселелер жөніндегі көмекшісі Юрий Ушаков мәлімдеді.
Бүгін кешке Ресей және АҚШ президенттері телефон арқылы сөйлесті, — деді ол.
Кремль өкілінің айтуынша, бұл Путин мен Трамп арасындағы екі айдан астам уақыттағы алғашқы әңгіме. Сондай-ақ байланыс АҚШ пен Израильдің Иранға жасаған соққысынан кейін алғаш рет орнатылған.
Ушаков президенттер арасындағы әңгімені ашық, іскер әрі конструктивті деп сипаттады. Оның сөзінше, мұндай формат Ресей мен АҚШ көшбасшылары арасындағы диалогқа тән қалыпты байланыс тәсілі.
Бұған дейін АҚШ өкілдері Ресей мен Украина арасындағы дағдарысты шешу бағытындағы келіссөздер жақын арада Владимир Зеленский мен Владимир Путин арасындағы жеке кездесуге ұласуы мүмкін екенін айтқан. Бұл туралы АҚШ-тың арнайы өкілі Стив Уиткофф мәлімдеген. Ақпаратқа сәйкес, ықтимал келіссөздерге Дональд Трамп та қатысуы мүмкін.
