Петропавл қаласындағы жаратылыстану-математикалық бағыттағы Назарбаев Зияткерлік мектебінде төтенше жағдай болды: мектеп оқушысы үшінші қабаттағы терезеден құлап кеткен, – деп хабарлайды aqshamnews.kz тілшісі.
Оқу орнының мәліметінше, қазір оқиғаның себептері мен мән-жайы анықталып жатыр.
«17 ақпанда мектеп оқушысы үшінші қабаттан құлау салдарынан жарақат алды. Қазіргі уақытта ол медициналық мекемеде жатыр», — деп түсіндірді Петропавлдағы НЗМ баспасөз қызметі.
Облыстық денсаулық сақтау басқармасы зардап шеккен жасөспірімнің жарақатпен көпсалалы қалалық ауруханаға жеткізілгенін хабарлады.
«Ол жансақтау бөлімінде. Жағдайы ауыр, бірақ есін біледі. Толық ақпаратты кейінірек береміз», — деді облздрав өкілдері.
Белгілі болғандай, оқушы 18 жаста.
Еске салайық, бұған дейін ақпан айының басында Солтүстік Қазақстан облысында жоғары сынып оқушысы мектеп дәретханасында сірке суын ішіп қойған еді. Оқиға Айыртау ауданындағы орта мектепте болған. 16 жастағы оқушы алғашқы сабақта дәретханаға сұранып шығып, сол жерде сірке суын ішкен. Оны мектеп қызметкерлері байқап, ауыр жағдайда МИ-8 тікұшағымен облыстық балалар ауруханасына шұғыл жеткізген. Кейін облыстық денсаулық сақтау басқармасы оқушының жағдайы жақсарып келе жатқанын мәлімдеді.
Ведомствоның хабарлауынша, науқаста тыныс жолдарының, ауыз-жұтқыншақтың, өңештің, асқазанның және терінің жедел химиялық күйігі болған. Кейінгі мәлімет бойынша жағдайы орташа ауыр, оң динамика байқалады. Ол жансақтау бөлімінен хирургия бөліміне ауыстырылып, емін жалғастырып жатыр.