Павлодар облысында жантүршігерлік жол апатына кінәлі деп танылған жүргізуші 5 жылға бас бостандығынан айырылды. Апат салдарынан жүкті әйел, оның кәмелетке толмаған ұлы және тағы бір жолаушы көз жұмған, – деп хабарлайды aqshamnews.kz тілшісі.
Оған сот үкімі шықты. Ер адам 5 жылға бас бостандығынан айырылды.
Қайғылы оқиға былтыр жазда Атамекен – Русская Поляна автожолында болған. Республикалық трассаның 42-шақырымында жүргізуші жылдамдықты төмендетпей, көлікті басқара алмай, жол жиегіне аударылған.
Сотта анықталғандай, ол бірнеше жыл бойы заңсыз жолаушы тасымалымен айналысқан. Апат болған күні ер адам жұбайымен бірге Павлодардан Ақтоғайға жолаушыларды алып шыққан. Жол апаты салдарынан жүктіліктің алтыншы айындағы жас әйел мен оның 13 жастағы ұлы оқиға орнында қаза тапты. Тағы үш адам, соның ішінде жүргізушінің өзі де, ауруханаға жеткізілген. Ал екінші жолаушы арада бір жарым айға жуық уақыт өткенде жансақтау бөлімінде көз жұмған.
Сот мәліметінше, айыпталушы бір ғана дөңгелегінің тозғанын айтқан. Алайда көлікті тексеру хаттамасында төрт бірдей шинаның протекторлары жоқ екені көрсетілген.
Сот ер адамды Қылмыстық кодекстің 345-бабы 4-бөлігі — «Жол жүрісі қағидаларын бұзу салдарынан абайсызда екі немесе одан да көп адамның өліміне әкеп соғу» бойынша кінәлі деп таныды. Ол ең төменгі қауіпсіздік мекемесінде жазасын өтейді. Сондай-ақ 7 жылға көлік жүргізу құқығынан айырылды. Үкім оқылғаннан кейін сот залында қамауға алынды.
Сотталған азамат қаза тапқан жүкті әйелдің анасы мен жұбайына 5 миллион теңгеден өтемақы төлеуге міндеттелді.
Судьяның айтуынша, моральдық шығын толық көлемде өндірілген. Өйткені жәбірленуші ер адам бұл апатта жұбайынан, ұлынан және әлі дүниеге келмеген баласынан айырылса, екінші жәбірленуші қызы мен немересінен айырылған.
Алайда марқұм әйелдің туыстары сот үкімімен келіспей отыр. Олар жазаны жеңіл деп санап, үкімге шағымданбақ.
Қаза тапқан әйелдің жұбайы бұл апатта бүкіл отбасынан айырылғанын айтып, кінәліге қатаңырақ жаза сұрағанын жеткізді. Оның сөзінше, бірнеше жылдан кейін бостандыққа шыққан соң, сотталған азамат қайтадан заңсыз жолаушы тасымалымен айналысуы мүмкін.
Сонымен қатар сот Павлодар облыстық Полиция департаменті мен Мемлекеттік кірістер департаментінің атына заңсыз жолаушы тасымалдаумен айналысатын жүргізушілерді анықтау бойынша шара қабылдау жөнінде жеке қаулы шығарды.
Еске салайық, биыл наурызда Жамбыл облысында да адам өлімімен аяқталған жол апатына қатысты сот шешімі шыққан болатын. Іс материалдарына сәйкес, белгілі спортшы Шавкат Рахмоновтың жұбайы көлікті шаршаған күйде басқарып, тізгінге ие бола алмай қарсы жолаққа шығып кеткен. Соның салдарынан көлік аударылып, екі жолаушы — сотталушының құрбысы мен әпкесі қаза тапқан. Сот оны да 5 жылға бас бостандығынан айырып, 7 жылға көлік жүргізу құқығынан айырған.