Пара үстел теннисінен ел чемпионатында ШҚО спортшылары 19 медаль жеңіп алды, – деп хабарлайды aqshamnews.kz тілшісі.
Жарыс қорытындысы бойынша шығысқазақстандық спортшылар 9 алтын, 3 күміс және 7 қола медаль жеңіп алды. Бұл өңірдегі параспорттың дамып келе жатқанын дәлелдеді.
Жекелей, жұптық және аралас жұптық сайыстарда жерлестеріміз жеңіс тұғырынан көрінді. Атап айтқанда, Анна Кутявина, Евгений Федоренко және Асхат Нұрмағамбетов жекелей сында чемпион атанса, Игісінова, Ванюшкин және Мазаева жұптық жарыстарда алтын медаль еншіледі.
Сонымен қатар бірнеше спортшы күміс және қола жүлделерді жеңіп алып, команданың жалпы жетістігіне өз үлестерін қосты. Чемпионат барысында жоғары техникалық шеберлігімен және жеңіске деген жігерімен ерекшеленген Данияр Түсіпхановтың өнері де мамандар тарапынан жоғары бағаланды.
Мамандардың айтуынша, чемпионаттағы бұл табыс өңірдегі паралимпиадалық қозғалыстың дамуына тың серпін беріп, жаңа жеңістерге жол ашады.