Ақмола облысы ТЖД баспасөз қызметінің мәліметінше, 26 ақпан күні Щучинск қаласындағы «Центр плова» дәмханасында кешкі уақытта бес қабатты тұрғын үйге жапсарлас орналасқан бір қабатты дәмханада газ-ауа қоспасының жарқылы болып, артынша өрт шыққан, – деп хабарлайды aqshamnews.kz тілшісі.
Жарылыс салдарынан қаза тапқандар саны жеті адамға дейін өсті. Бұл туралы 27 ақпанда Ақмола облысы әкімдігінің баспасөз қызметі де растады.
Қайғылы оқиға салдарынан қаза болғандардың арасында 16 жастағы қыз бар. Қазіргі таңда 13 зардап шегуші Бурабай аудандық ауруханасында ем қабылдап жатыр. Алты адам амбулаториялық бақылауға жіберілген.
Денсаулық сақтау басқармасы тарапынан қосымша медициналық бригадалар жедел түрде жасақталды. Барлық қажетті ресурстар, мамандар мен дәрі-дәрмек қоры жұмылдырылған. Санитарлық авиация оқиға орнына жіберілді.
Щучинск қаласының стационарына күйіктің әртүрлі дәрежесімен 13 науқас түскен. Олардың алтауы Көкшетау қаласындағы көпбейінді облыстық ауруханаға ауыстыруға дайындалуда. Облыс орталығынан қосымша үш анестезиолог-реаниматолог бригадасы тартылған.
Ақмола облысы әкімінің орынбасары Алтынай Амренова зардап шеккендерге барлық қажетті медициналық көмек толық көлемде көрсетіліп жатқанын мәлімдеді.
Қазіргі уақытта оқиға орнында облыстық жедел штаб жұмыс істеуде. Жарылыстың себептері анықталуда. Облыс әкімдігі қаза тапқандардың отбасыларына және зардап шеккен азаматтарға қажетті көмек көрсететінін хабарлады.