Алматы облыстық Сүйінбай атындағы филармония мен Өзбекстанның Бұхара облыстық мемлекеттік филармониясы ынтымақтастық туралы меморандумға қол қойды, – деп хабарлайды aqshamnews.kz тілшісі.
Өзбекстан Республикасының Бұхара қаласында Алматы облыстық Сүйінбай атындағы филармония мен Бұхара облыстық мемлекеттік филармониясы арасында мәдениет және өнер саласындағы өзара ынтымақтастықты дамыту жөніндегі меморандумға қол қойылды.
Құжатқа Бұхара облыстық мемлекеттік филармониясының директоры Рауф Расулович Авезов пен Алматы облыстық Сүйінбай атындағы филармонияның директоры Сәбит Әбдіхалықов қол қойды.
Меморандум екі елдің мәдени байланысын нығайтуға, шығармашылық ұжымдардың өзара тәжірибе алмасуына, бірлескен концерттер, фестивальдер мен мәдени жобаларды жүзеге асыруға бағытталған.
Келісім аясында тараптар халықаралық мәдени іс-шараларды ұйымдастыру, гастрольдік сапарлар өткізу, ұлттық өнерді насихаттау және шығармашылық байланыстарды кеңейту бойынша бірлескен жұмыстар жүргізетін болады.
Аталған меморандум Қазақстан мен Өзбекстан арасындағы мәдени-гуманитарлық ынтымақтастықты дамытуға және екі халықтың рухани байланысын одан әрі нығайтуға қызмет етеді.