Қала күніне арналған негізгі салтанатты іс-шара мегаполистің Астана алаңында өтуде. Ел алдына шығып сөз сөйлеген Алматы әкімі Дархан Сатыбалды жиналған қауымды Қала күнімен құттықтады.
Сондай-ақ тарихы терең қаламыздың Тәуелсіздіктің талбесігі ретінде айрықша орынға ие екенін, дәл осы жерде егемен еліміздің талай тағдырлы шешімі қабылданып, мемлекет дамуына тың серпін бергенін атап өтті.
Ауа райы да жарқырап тұрғандықтан болар, мереке мезеттеріне куә болуға асыққан алматылықтар мен қала қонақтарында сан жоқ. Ардагерлер, мемлекет және қоғам қайраткерлері, зиялы қауым өкілдері де төрден орын алды.
_”Алматы мәдениет пен білімнің берекелі ошағы ғана емес, үлкен өркениеттің де бастауы. Қала жаңа технология, жасанды интеллект пен инвестицияның орталығына айналуда. Бұл орайда жемісті жетістіктер жалғасын таба береді, ол үшін барлық жағдайды жасаудамыз", – деді шаһар басшысы.
Жарқын көңіл күйдегі үлкен-кіші бас қосқан Астана алаңын отандық жұлдыздардың ән-жыры тербеп тұр қазір. Мерекелік сахнада Роза Рымбаева, аңызға айналған "Дос-Мұқасан", Зарина Алтынбаева, Жәмила Серкебаева, Біржан Хасанғалиев, Бауыржан Мусин, Аружан Данышпан, Ерлан Байназаров, “Il canto" квартеті және басқа да артистер өнер көрсетті. Көптің ықылас-қошаметі де мерекенің ажарын айшықтай түсті.