Бүгін Алматы Мәслихатының кезекті ХХХIV сессиясы өтіп, қала өміріне қатысты бірқатар маңызды шешімдер қабылданды.
Алдымен депутаттар Алматыдағы 156 жаңа көшеге атау беру туралы ұсынысты қолдады. Бұл шешім тұрғындардың тұрмысын жеңілдетіп қана қоймай, халқымыздың біртуар тұлғаларының есімін ұлықтауға жол ашты. Қала картасында мәңгілікке сақталатын атаулардың қатарында жазушы Әбдіжәміл Нұрпейісов, ақын Мұзафар Әлімбаев, ғалым Қайым Мұхамедханов, тілші-ғалым Әбдуәлі Қайдар, түрколог Рәбиға Сыздықова, суретші-мультипликатор Әмен Қайдаров, спортшы Денис Тен сынды есімдер бар.
Сонымен қатар, Қазақстан мен Вьетнам арасындағы достықты дәріптеу мақсатында бір көшеге вьетнам халқының ұлт-азаттық қозғалысының көсемі Хо Ши Миннің есімі берілмек. Бұл – халықаралық ынтымақтастықтың белгісі ретінде бағаланды.
Сессияда бұдан бөлек, қала тұрғындарының дәрілік қамтамасыз етілуін кеңейту мәселесі мақұлданды. Енді қосымша 10 түрлі нозология бойынша 23 пациент жергілікті бюджет есебінен тегін дәрі-дәрмекпен қамтылатын болады.
Ал қысқы кезеңде жол қозғалысының қауіпсіздігін сақтау үшін сессия шешімімен күшейтілген режимде жолдарды күтіп-ұстау тәртібіне толықтырулар енгізілді. Қар қалың түскен жағдайда қала көшелерінде техника мен жұмысшылардың саны жедел арттырылады.