Алматыдағы Республика сарайы ғимаратында кәсіпкерлерді, инвесторларды және халықаралық сарапшыларды біріктірген Еуразиядағы ірі бизнес алаңдардың бірі - New Vision Forum 2026 өтіп жатыр, – деп хабарлайды aqshamnews.kz тілшісі.
Форум жұмысына Алматы қаласы әкімінің орынбасары Олжас Смағұлов қатысты.
Іс-шара барысында қатысушылар жаһандық тұрақсыздық жағдайындағы кәсіпкерлікті дамыту, жасанды интеллекттің бизнеске ықпалы, инвестициялық ахуал, логистика, компанияларды ауқымдандыру және адами капиталды дамыту мәселелерін талқылады.
CEO New Vision Forum негізін қалаушы Мақсат Құрбеновтың айтуынша, бүгінде кәсіпкерлерге жаңа идеялар тауып, серіктестермен байланыс орнатуға және дамудың жаңа мүмкіндіктерін іздеуге көмектесетін қауымдастықтардың маңызы артып келеді.
Форумның негізгі спикерлерінің бірі – Айдын Рахымбаев. Ол бизнестің тұрақты дамуы үшін мықты корпоративтік мәдениеттің, командалық жұмыстың және үздіксіз білім алудың маңызын атап өтті.
Бизнесті ауқымдандыру мәселесіне Елдар Абдразақов тоқталды. Оның пікірінше, ел экономикасының одан әрі өсуі ірі компаниялардың дамуымен тығыз байланысты.
«Қазақстандағы 500 ірі компания ел экономикасының шамамен жартысын қалыптастырады. Дәл осындай қуатты корпоративтік жүйелер жаңа нарықтарды, стандарттарды және брендтерді қалыптастыруға қабілетті», – деді Елдар Абдразақов.
Форумда банк секторының болашағы, цифрлық технологиялар және клиенттерге қызмет көрсету сапасы да бизнестің бәсекеге қабілеттілігін айқындайтын негізгі факторлар ретінде кеңінен талқыланды.
New Vision Forum 2026 Алматы қаласы әкімдігінің қолдауымен 11-13 маусым аралығында өтіп жатыр.