Алматы қаласы аудандары арасында ұйымдастырылып жатқан эстафета аясында Наурызбай ауданында ауқымды сенбілік өтеді, – деп хабарлайды aqshamnews.kz тілшісі.
Сенбіліктің басты мақсаты - аудан аумағының санитарлық тазалығын қамтамасыз ету, қоғамдық кеңістіктерді абаттандыру, қоршаған ортаға ұқыпты қарау мәдениетін қалыптастыру және тұрғындарды ортақ іске жұмылдыру.
Ауқымды сенбілікке 1500 - ге жуық адам қатысады. Олардың қатарында аудан тұрғындары, мемлекеттік мекеме қызметкерлері, еңбек ұжымдары, қоғамдық ұйымдар, еріктілер және белсенді азаматтар бар.
Іс-шара барысында қатысушылар аумақты санитарлық тазалау, абаттандыру және көріктендіру жұмыстарына атсалысады.
Сонымен қатар, Алматы қаласы күніне орай тұрғындарға алма тарату ұйымдастырылады.
Сенбілікке қатысушылар мен тұрғындар үшін арнайы мерекелік бағдарлама да қарастырылған. Бағдарлама аясында Белсенді ұзақ өмір сүру орталығының қатысуымен түрлі белсенділік шаралары, Zumba жаттығулары және балаларға арналған аниматорлар ұйымдастырылады.
Іс-шара тек тазалық жұмыстарын жүргізумен шектелмей, тұрғындардың қоғамдық белсенділігін арттыруға, салауатты өмір салтын насихаттауға, экологиялық мәдениетті қалыптастыруға және аудан тұрғындарын ортақ игі іске біріктіруге бағытталған.
Республикалық «Таза Қазақстан» экологиялық акциясы - қоршаған ортаны қорғау, елді мекендердің тазалығы мен көркеюін қамтамасыз ету және азаматтардың туған жерге деген жауапкершілігін арттыруға бағытталған маңызды бастама.
Өтетін күні: 12 қыркүйек 2026 жыл
Басталу уақыты: сағат 09:00
Өтетін орны: Алматы қаласы, Наурызбай ауданы, Тәжиев көшесі, 106