Алматыда С.Д. Асфендияров атындағы Қазақ ұлттық медицина университетінің бірінші курс студенттерінің қатысуымен «Жарқын болашақ» қалалық профилактикалық форумы өтті, – деп хабарлайды aqshamnews.kz тілшісі.
Іс-шараны Алматы қаласы Полиция департаментінің Есірткі қылмысына қарсы іс-қимыл басқармасы, ҚР Ішкі істер министрлігі, С.Д. Асфендияров атындағы ҚазҰМУ, Алматы қаласы бойынша Экономикалық тергеп-тексеру департаменті және қалалық Жастар саясаты басқармасы бірлесіп ұйымдастырды.
Студенттерге интернет пен мессенджерлер арқылы жастарды есірткінің заңсыз айналымына тартудың заманауи тәсілдері, мұндай әрекеттер үшін көзделген қылмыстық жауапкершілік, сондай-ақ дропперлікке, интернет-алаяқтыққа, ойынға тәуелділікке және өзге де цифрлық қауіптерге байланысты тәуекелдер түсіндірілді.
Кездесуде жастарды қылмыстық әрекетке тарту әрекеттерін дер кезінде тану және құқыққа қайшы контентке қауіпсіз әрі дұрыс әрекет ету мәселелеріне ерекше назар аударылды. Қатысушыларға профилактикалық бейнематериалдар көрсетіліп, ашық сұрақ-жауап сессиясы ұйымдастырылды.
Форум полиция мен жастар арасындағы тікелей диалогты нығайтатын кезекті алаңға айналды. Оның негізгі мақсаты – жастардың құқықтық сауаттылығын арттыру, жауапты мінез-құлықты қалыптастыру және қылмыстық әрекеттің кез келген түріне жол бермеу ұстанымын нығайту.
Алматы қаласы Полиция департаментінің баспасөз қызметі