Әлеуметтік желілерде азаматтардың жеке деректерінің таралуы туралы ақпаратқа байланысты Цифрлық даму, инновациялар және аэроғарыш өнеркәсібі министрлігі тексеріс жүргізіп жатыр, деп хабарлайды aqshamnews.kz
Ақпараттық қауіпсіздік комитеті құқық қорғау және арнайы органдармен бірлесіп, деректердің шынайылығы мен таралу көзін анықтауда.
Алғашқы талдау мәліметтердің мемлекеттік емес, жеке жүйелерден алынуы мүмкін екенін көрсетіп отыр. Мемлекеттік ақпараттық жүйелерден деректердің таралуы немесе бұзылу фактілері тіркелмеген.
Егер азаматтың деректері таралса, ол туралы eGov порталы арқылы жеке кабинетіне хабарлама жіберіледі.
Бұған дейінгі ұқсас жағдайларда ақпарат ескі дерекқорлардан – көбіне қызмет көрсету ұйымдары мен микроқаржы құрылымдарынан алынған.
Министрлік жағдайды бақылауда ұстап отыр. Қосымша ақпарат тексеріс аяқталғаннан кейін беріледі.