Физикалық жаттығулар мидың қорғаныш тосқауылын нығайтып, когнитивтік қабілеттерді сақтауға көмектеседі. Мұндай қорытындыға University of California, San Francisco (UCSF) ғалымдары келді. Зерттеу нәтижелері Cell журналында жарияланған, - деп хабарлайды Aqshamnews.kz тілшісі.
Ғалымдардың түсіндіруінше, жас ұлғайған сайын гематоэнцефалиялық тосқауыл (ми қан-тосқауылы) әлсіреп, өткізгіштігі артады. Бұл миға уытты заттар мен қабыну молекулаларының өтуін күшейтіп, есте сақтау қабілетінің төмендеуіне және нейродегенеративті аурулардың, соның ішінде Альцгеймер дерті қаупінің артуына әкеледі.
Бұған дейін зерттеушілер физикалық белсенділік кезінде бауыр GPLD1 ферментін бөлетінін анықтаған. Алайда бұл ферменттің миға қалай әсер ететіні белгісіз болған, себебі ол қан-тосқауыл арқылы тікелей өте алмайды.
Жаңа зерттеу GPLD1 жанама жолмен - TNAP ақуызы арқылы әсер ететінін көрсетті. Жас ұлғайған сайын TNAP гематоэнцефалиялық тосқауыл жасушаларында жиналып, оны әлсіретеді. Ал жаттығу кезінде бауырдан бөлінген GPLD1 ми тамырларына жетіп, жасуша бетіндегі TNAP ақуызын «кесіп тастайды». Соның нәтижесінде тосқауылдың өткізгіштігі төмендейді.
Тышқандарға жүргізілген тәжірибелер TNAP деңгейін азайту тіпті егде жаста да ми тосқауылының беріктігін арттырып, қабынуды азайтатынын және жады тестілерінің нәтижесін жақсартатынын көрсетті.
Зерттеу авторларының пікірінше, TNAP-қа әсер ететін препараттарды әзірлеу жасқа байланысты когнитивтік бұзылыстардың алдын алудың жаңа тәсілін ұсынуы мүмкін. Ал әзірге миды қартаюдан қорғаудың ең қарапайым әрі қолжетімді жолы - тұрақты дене белсенділігі.