Мемлекет басшысы бірқатар қазақстандықтарды мемлекеттік наградалармен марапаттады, – деп хабарлайды aqshamnews.kz тілшісі.
Қазақстан Республикасының Президенті Қасым-Жомарт Тоқаев Алматы облысына жұмыс сапары барысында мәдениет қайраткерлеріне, шығармашылық зиялы қауым өкілдеріне және отандық бизнес өкілдеріне мемлекеттік наградаларды табыстады.
Жоғары мемлекеттік наградаларға Билалдин Ушуров, Сытқы Мұстафа, Ерлік Балфанбаев, Александр Павлов, Ақылбай Сапаров, Зарина Самигуллина және Наталья Шин ие болды.
Наталья Шиннің айтуынша, бұл марапат ол үшін күтпеген жаңалық болған:
«Бұл – біздің бүкіл кәсіпорнымыз үшін үлкен мәртебе. Әрбір жетістіктің артында қызметкерлеріміздің кәсібилігі, жауапкершілігі және күнделікті қажырлы еңбегі тұр.
Біз өз бизнесіміздің Алматы облысында дамып келе жатқанын мақтан тұтамыз. Еңбегіміздің нәтижесі осы көркем өңірдің дамуына, оның өнеркәсіптік әлеуетінің нығаюына және тұрғындарының әл-ауқатының артуына қызмет етуі біз үшін аса маңызды.
Көрсетілген зор құрмет үшін Мемлекет басшысына, сондай-ақ сенім білдіріп, қолдау көрсетіп жүрген қызметкерлерімізге, серіктестерімізге және клиенттерімізге алғысымды білдіремін.
Біз алдағы уақытта да Қазақстанның игілігі жолында еңбек етіп, жаңа жұмыс орындарын ашуға, бизнесті дамытуға, заманауи технологияларды енгізуге және еліміздің экономикасының өркендеуіне өз үлесімізді қоса береміз».