Оқушыларды тасымалдау үшін 60 мектепке 300 мектеп автобусы жұмылдырылады, деп хабарлайды aqshamnews.kz тілшісі.
Алматыда қыркүйектің алғашқы күндері қаланың көлік инфрақұрылымына түсетін жүктеме айтарлықтай артпақ. Жаңа оқу жылының басталуына байланысты жолда жеке автокөліктер мен жүргіншілер саны бір мезгілде көбейеді. Балалардың қауіпсіздігін қамтамасыз ету, көлік жүктемесін азайту және қала тұрғындарының жайлы жүріп-тұруына жағдай жасау мақсатында Алматы әкімдігі бірқатар ұйымдастырушылық шара қабылдады.
Мектептер мен оқушылар
Оқушыларды тасымалдау үшін 60 мектепке 300 мектеп автобусы жұмылдырылады. Олар 13 мыңнан астам баланы қамтиды.
Білім беру ұйымдарының маңында жол қозғалысын реттеу күшейтіледі. 1 қыркүйек күні таңертең мектептердің маңында, жүргіншілер өткелдерінде және көлік қозғалысы ең көп учаскелерде 470 полиция қызметкері кезекшілік атқарады.
Тұрғындардан жеке автокөлікпен мектептің кіреберісіне дейін бармау және мүмкіндігінше балама қозғалыс тәсілдерін алдын ала қарастыру сұралады.
Қоғамдық көлік және метро
Жаңа оқу жылының алғашқы екі аптасында жолаушылар тасымалына деген қосымша сұранысты қамтамасыз ету үшін қоғамдық көліктің жұмысы күшейтіледі.
Қолданыстағы 3 200 автобусқа қосымша резервтен 500-ге жуық автобус шығарылады. Бұл жолаушылар саны жоғары бағыттардағы жылжымалы құрам санын арттырып, қарбалас уақытта қозғалыс аралығын қысқартуға мүмкіндік береді.
Метро жұмысы да күшейтіледі. Пойыздар саны 11-ден 13 құрамға дейін көбейтіліп, таңғы уақытта қозғалыс аралығы 3 минутқа дейін қысқарады.
Қауіпсіздікті күшейту
Жаңа оқу жылы қарсаңында әкімшілік полициямен бірлесіп, білім беру ұйымдарының маңындағы жол инфрақұрылымының жағдайы тексерілді.
Тексеру барысында бағдаршамдарға, жол белгілері мен жол таңбаларына ерекше назар аударылды. Соның нәтижесінде 140-тан астам ескерту бойынша кемшіліктер жойылды. Барлық білім беру ұйымының маңында қажетті жұмыстар жүргізілді. Сондай-ақ, мектеп аумақтары тәулік бойы бейнебақылауда болады.
Жүк көліктерінің қозғалысын шектеу
Қыркүйектің алғашқы аптасында жүк көліктерінің қозғалысына бақылау күшейтіледі.
Қолданыстағы шектеуге сәйкес, салмағы 8 тоннадан асатын жүк көліктерінің белгіленген учаскелерде сағат 07:00-ден 22:00-ге дейін жүруіне тыйым салынады. Бұл шектеудің қаланың тыныс-тіршілігін қамтамасыз етуге қажетті тасымалдарға қатысы жоқ.
Жұмысты ұйымдастыру
Қала орталығында орналасқан ірі компанияларға, банктерге және басқа да ұйымдарға қыркүйектің алғашқы күндері қызметкерлердің бір бөлігін уақытша қашықтан жұмыс істеу форматына ауыстыру мүмкіндігін қарастыру немесе жұмыс күнінің басталу уақытын икемді ету ұсынылды.
Өз кезегінде әкімдіктің құрылымдық бөлімшелері мен оларға қарасты ұйымдар 2026 жылы 1-5 қыркүйек аралығында қызметкерлердің бір бөлігін қашықтан жұмыс істеу форматына ауыстыру шараларын қабылдап, сондай-ақ қоғамдық көлікті пайдалануды ұсынады.
Қала тұрғындарынан бағытын алдын ала жоспарлау, мүмкіндігінше таңғы уақытта жеке автокөлікпен жолға шықпау, сондай-ақ қоғамдық көлік пен метроны пайдалану сұралады.