Ақтөбеде клиенттің көлігін рұқсатсыз мініп кеткен автосервис шебері сот үкімімен 4 жылға бас бостандығынан айырылды. Оқиға салдарынан көлікті жөндеуге шамамен 8 миллион теңге қажет болған, – деп хабарлайды aqshamnews.kz тілшісі.
Іс материалдарына сүйенсек, Ақтөбе тұрғыны 2024 жылы шығарылған Kia Sportage автокөлігін несиеге сатып алған. Кейін көліктегі жеңіл зақымдарды жөндетіп, сырлатпақ болып, танысының кеңесімен шеберге жүгінген. Жөндеу құны 250 мың теңгеге бағаланып, көлік иесі кешкі уақытта темір тұлпарын кілтімен бірге қалдырып кеткен. Сондай-ақ ол алдын ала 150 мың теңге төлеген.
Алайда арада бірнеше сағат өткен соң шебер көлік иесінен рұқсат алмастан, клиенттің автокөлігімен Алға қаласына жөндеу мен бояуға қажет құрал-жабдық алуға кеткен. Ол жаққа аман жеткенімен, ауа райының қолайсыздығы мен жолдың жабылуына байланысты бірден қайта алмаған.
Кейін шебер досымен бірге көлік ішінде алкоголь ішкен. Артынша дүкенге бармақ болып, рөлге отырған сәтте көлікті басқара алмай, жол апатына ұшыраған. Көлік иесі бұл жағдай туралы тек келесі күні полициядан естіген.
Сараптамаға сәйкес, көлікті қалпына келтіру құны шамамен 8 миллион теңгені құраған. Айыпталушы шығынды толық өтей алмағандықтан, ірі көлемде залал келтіре отырып, автокөлікті заңсыз иелену бабы бойынша сотқа тартылған.
Сот барысында 48 жастағы шебер кінәсін толық мойындаған. Үкім шыққанға дейін ол тек 2 миллион теңге өтеген. Ал жәбірленуші қалған 5 миллион теңгеден астам соманы өндіріп беруді сұрап, соттан айыпталушыны бас бостандығынан айырмауды өтінген.
Соған қарамастан, сот автосервис шеберін жалпы режимдегі колонияда 4 жыл жазасын өтеуге үкім етті.