Мемлекет басшысы 2022 жылғы 1 қыркүйектегі «Әділетті мемлекет. Біртұтас ұлт. Берекелі қоғам» тақырыбындағы Жолдауында еліміздің экономикалық дамуы, мемлекеттік басқару ісін жаңғырту, өнеркәсіпті күшейту, білім мен ғылым, мәдениет пен бизнесті қолдау мәселелеріне айқын тоқталды.
Президент осы Жолдауында «Халық үніне құлақ асатын мемлекет» қағидасын ұстана отырып, ел бірлігі мен тұтастығын, ел егемендігін, халқымыздың татулығы мен тұрақтылығын сақтауға шақырды.
Маңызды мәселе – адам әлеуетін дамыту, сұранысқа ие мамандардың біліктілігін арттыру, Қазақстанда ғана емес, өзге елдерде де бәсекеге қабілетті мамандарды дайындау бағытында идеологиялық жұмыстар жүргізу жөнінде айтты. Біз мәдениет саласының өкілдері ретінде осы бағытта жас, креативті, еңбекқор мамандарды тарту бойынша жұмыстар жүргіземіз. Дамыған елдердің тәжірибесіне сүйенсек, олар мықты деген жас ғалымдарды, білімді мамандарды өз саласына тартумен айналысқан. Шынымен де, мемлекет үшін қажет, орасан зор пайдасы бар игі іс.
Президент тағы бір маңызды бастама – саналы, білімді, ақыл-парасаты мол және ғылыми-мәдени өрісі кең ұрпақ тәрбиелеу аса қажет екендігін баса айтты. Біз осы орайда Жолдауға қолдау білдіру үшін, ондағы мақсаттарды жүзеге асыру бағытында мәдениеті бекем, руханиятқа жақын ұрпақ тәрбиелеу ісіне атсалысып келеміз. Осы мақсаттағы жұмыстарды алдағы уақытта да қарқынды түрде жүзеге асыруымыз қажет. Музей жастарды, өскелең ұрпақты тәрбиелеу негізі ретінде үлкен рөл атқарып келеді. Жас ұрпақты әдепті де саналы етіп тәрбиелеу үшін ең алдымен ұлттық дәстүрімізді, әдет-ғұрыптарымызды, дінімізді, ата-бабалардан қалған насихат-мұраларды жастардың санасына сіңіре білуіміз керек. Музейге келген жастар музейден өздеріне қажетті ақпарат алып, білімдерін толықтырады, рухани қуат алады. Демек, музей – өскелең ұрпақтың отансүйгіштік сезімін арттырып, елін сүюге тәрбиелейтін бірден-бір құрал екені сөзсіз.
20 қараша күні кезектен тыс Президент сайлауы өтеді. Бұл сайлаудан жастар да тыс қалмаса екен дейміз. Олардың да дауысы біз үшін маңызды. Жолдауда айтылған мақсат-міндеттердің денін де білімді, жігерлі, санасы сергек жастар қолға алады деп сенеміз.