Алматы қаласының Медеу ауданында орналасқан №5 Оқушылар үйінде «Күншуақ» жазғы ойын-сауық алаңы ашылды, – деп хабарлайды aqshamnews.kz тілшісі.
Іс-шараға аудандық білім беру ұйымдарының өкілдері, ата-аналар мен балалар қатысты.
Мерекелік кеште сөз алған Медеу аудандық білім бөлімінің әдіскері Назым Сарсебаева жаз мезгілінде балалардың бос уақытын мазмұнды әрі тиімді ұйымдастырудың маңыздылығына тоқталып, «Күншуақ» жазғы алаңы олардың шығармашылық қабілеттерін шыңдап, тұлғалық дамуына серпін беретін ерекше орта болатынын атап өтті.
– Қымбатты балалар! Сіздерді көптен күткен жазғы демалыстың басталуымен шын жүректен құттықтаймын! Алдағы жазғы лагерь күндері сіздерге жарқын әсерлер мен ұмытылмас естеліктер сыйлайтынына сенімдімін. Осы уақытты пайдалы өткізіп, жаңа оқу жылына күш-қуат пен шабыт жинаңыздар. Сіздер –талантымен танылып, шығармашылығымен дараланған дарынды балаларсыздар. Сондықтан бүгінгі құрмет те, мақтау мен мадақ та өздеріңізге арналады. Біз әрқайсыңыздың жетістіктеріңізбен мақтанамыз! Жаз айлары шаттыққа, қызықты оқиғаларға, жаңа достар мен жарқын жетістіктерге толы болсын! Мерекелеріңіз құтты болсын! – деді ол.
№5 Оқушылар үйінің директоры Сайрагүл Шағатаеваның мәліметінше, биыл жазғы лагерьге 1000-ға жуық бала қатысады. Балалармен 20 кәсіби педагог жұмыс жүргізеді.
– Бүгін біз Балаларды қорғау күні мен жазғы лагерьдің ашылу салтанатын қатар өткізіп отырмыз. Мұнда балалар таңғы сағат 8:30-дан 13:00-ге дейін әртүрлі үйірмелерге қатысып, өздерінің қызығушылықтары мен шығармашылық қабілеттерін дамыта алады. Лагерь бағдарламасында домбыра, ән-би, тоғызқұмалақ, шахмат, сурет салу және қолөнер үйірмелері қарастырылған. Міне, қазір балалар осы үйірмелерде үйренген өнерлерін көпшілік назарына ұсынып жатыр. Өткен жылы лагерь жұмысына 1500 бала қатысқан болатын, – дейді басшы.
«Қолөнер» шебер қолдар» үйірмесінің жетекшісі Жұлдызай Қасен 7–14 жас аралығындағы қыз балаларға жіп пен матадан түрлі бұйымдар жасауды үйретеді.
– Үйірмеде төрт топ жұмыс істейді. Қыздарымыз өте ынталы әрі икемді. Мұндай сабақтар балалардың ұсақ моторикасын жетілдіріп, шығармашылық ойлау қабілетін дамытады. Болашақта олардың жұмыстарынан көрме ұйымдастыруды жоспарлап отырмыз, – дейді үйірме жетекшісі.
Көп баланың ішінен «Шахмат патшалығы» үйірмесіне қатысатын, 6-сыныпты биыл аяқтаған Еркін Мұхамедаминді сөзге тарттық:
– Шахматқа кішкентай кезімнен қызығамын. Үйірмеге қатысып жүргеніме бір жыл болды. Қалалық жарыстарға қатысып, жүлделі орындар алып жүрмін. Үйде де жаттығамын. Мұнда келіп білімім мен тәжірибемді жетілдіремін. Шахматта әр қадамыңды ойланып жасасаң, жеңіске жетуге мүмкіндік мол, – дейді ол.
Жазғы лагерьдің ашылу салтанатында мерекелік көңіл-күй бірден сезілді. Әсем безендірілген алаңда шахмат ойнап отырған балалар, домбыра тартып, би билеп жүрген өнерпаздар, сурет салып жатқан жас суретшілер мен қолдарына ине-жіп ұстап, қолөнермен айналысқан бүлдіршіндер өте көп болды. Балаларының жүздеріндегі қуанышты көруге келген ата-аналар да жетерлік. Қызықты ойындар ұйымдастырып, балаларға ерекше көңіл-күй сыйлаған аниматорлар да мерекенің шырайын аша түсті.
Іс-шара барысында Медеу ауданы Білім бөлімінің басшысы Ақнұр Оразханқызы лагерь жұмысына белсене қатысып, жақсы нәтиже көрсеткен мамандарға Алғыс хаттар табыстады.
Ұйымдастырушылардың айтуынша, «Күншуақ» жазғы ойын-сауық алаңының бағдарламасына спорттық жарыстар, танымдық іс-шаралар, шығармашылық шеберханалар мен қызықты экскурсиялар қарастырылған.
Дана САДЫРҚАН