Мадридтік "Реалдың" жұлдызы, француз шабуылшысы Килиан Мбаппе Алматыда өткен Чемпиондар лигасының матчы аясындағы сапары жайлы айтты, деп хабарлайды Аqshamnews.kz. тілшісі.
Командадағы әріптесі, түрік жартылай қорғаушысы Арда Гюлер әлеуметтік желіде мадридтік клубтың Қазақстанға жасаған ұшу сапарынан бірнеше сурет жариялаған. Сол фотолардың бірінде ұшақта ұйықтап отырған Мбаппе де көзге түсті.
Фотосуреттерді көрген Килиан Мбаппе әзіл-шыны аралас пікір қалдырды:
"Қазақстанға барған сапар оңай болмады, бро", – деп жазды футболшы.
Еске салайық, Алматыда өткен "Қайрат" – "Реал" матчы Чемпиондар лигасының екінші туры аясында ұйымдастырылды. Испандық БАҚ дерегінше, мадридтік командаға Қазақстанға барып-қайту үшін шамамен 13 мың шақырым жол жүруге тура келген.
Бұл сапар тек Қазақстанда ғана емес, Еуропада да ерекше назарға ілікті. Испан басылымдары "Реалдың" Алматыға келуін "ерекше жағдай" деп бағаласа, алматылық жанкүйерлер клубты жылы қарсы алып, ойыншыларға өз қолдауларын көрсетті. Ойын 0:5 есебімен испандық клубтың пайдасына жазылды.