Желіде Шымкенттегі бірнеше мектепке "шабуыл жасалады" деген жалған ақпарат тарады, - деп хабарлайды aqshamnews.kz тілшісі.
16 қаңтарда Telegram-арналар мен топтарда белгісіз адамдар қаладағы шамамен 25 мектеп, гимназия және лицейдің атауын атап, "сол жерлерге барамыз" деп қорқытқан жазбалар жариялаған. Эмоцияға толы бұл хабарламалар ата-аналар мен мұғалімдер арасында үрей туғызды.
Алайда қалалық білім басқармасы бұл ақпараттың жалған екенін мәлімдеді. Ведомство өкілдерінің айтуынша, “баланың өміріне қауіп төніп тұр” деген хабарламалар шындыққа жанаспайды, қазіргі таңда қауіп төндіретін ешқандай оқиға тіркелмеген.
Басқарма мәліметінше, жағдай жауапты қызметтердің бақылауында. Жалған ақпарат жариялаған аккаунттар анықталып, тексеру жүргізіліп жатыр. Сонымен бірге тұрғындарға расталмаған, эмоцияға негізделген мәліметтің қоғамда орынсыз үрей туғызатынын ескертіп, тек ресми дереккөздерге сүйенуге және тексерілмеген ақпаратты таратпауға шақырды.
Қалалық полиция департаменті де мессенджерлерде тараған “мектептерде жаппай қылмыс болады” деген хабарламалардың фейк екенін растады. Құқық қорғау органдары тексеру шараларын бастап, қауіпсіздік режимін күшейткенін, жағдай толық бақылауда екенін хабарлады.
Сондай-ақ полицейлер қасақана жалған ақпарат тарату заң бойынша қылмыс екенін еске салды: мұндай әрекет үшін 5 жылға дейін бас бостандығынан айыру жазасы қарастырылған. Ресми органдар тұрғындарды сабыр сақтап, тек сенімді ақпарат көздеріне ғана сенуге үндеді.
