Жетісу ауданының мектептеріндегі оқушы орындарының тапшылығына қатысты жағдай салыстырмалы түрде қолайлы
Бүгінгі таңда тапшылық шамамен 3000 орынды құрайды.
Бұл туралы Алматы әкімі Ерболат Досаев Жетісу ауданы тұрғындарымен өткен кездесуде айтты, деп хабарлайды Almaty-akshamy.kz.
«Халық санының өсуі мен аудандағы тұрғын үй құрылысының қарқынын ескере отырып, біз биыл «Жайлы мектеп» ұлттық жобасы шеңберінде Боралдай көшесінде 1200 орындық бір жаңа мектептің құрылысын бастауды жоспарлап отырмыз. Сондай-ақ 148, 103 және 112 мектептерге 750 орындық қосымша құрылыс салу жұмыстары жүріп жатыр», - деді Алматы әкімі Ерболат Досаев.
148-ші мектепке 300 орындық қосымша ғимараттың құрылыс-монтаждау жұмыстары жүргізілуде, 2023 жылдың III тоқсанында аяқтау жоспарлануда.
103-ші мектепке 200 орындық (мердігер - Global Construction) және 112-ші мектепке 250 орындық қосымша ғимараттардың құрылыс-монтаждау жұмыстары бойынша (мердігер - Sheber Building) мердігер ұйымдар анықталды. Осы екі мектеп бойынша құрылыс жұмыстарын биыл маусым айында бастап, 2024 жылдың I тоқсанында аяқтау жоспарлануда.
Бұнымен қатар биыл маусым айында Айнабұлақ шағын ауданындағы 160 орындық балабақшаның құрылысы аяқталады.