Жоғалған жігіттің қай бағытқа кеткенін ешкім көрмеген
Атырау облысында із-түзсіз жоғалған 24 жастағы жігітті іздеу тоқтатылды. Өйткені, 20 қарашадан бері жүргізілген іздестіру жұмыстары нәтиже бермеді. Атырау облыстық төтенше жағдайлар департаментінің қоғаммен байланыс тобы мәлім еткендей, 24 жастағы жігіт 20 қарашада із-түзсіз жоғалып кеткен, деп хабарлайды Almaty-akshamy.kz.
Қызылқоға ауданындағы Жамбыл ауылдық округіне қарайтын Қаракөл ауылында тұрған жігіт сағат 5:00-де үйінен шығып кеткен. Содан бері одан еш дерек болмай тұр.
Жоғалған жігіттің қай бағытқа кеткенін ешкім көрмеген. Алғашқы күні оны іздестіруге төтенше жағдайлар департаменті мен Қызылқоға аудандық полиция бөлімінен, жергілікті атқарушы орган мен туыстарынан 37 адам тартылған. Іздеу жұмыстары төрт күн қатарынан жүргізіліп, кейін тоқтатылған.
«Хабар-ошарсыз кеткен жігітті іздеу үшін 30 қарашада жергілікті уақытпен сағат 9:52-де «ҚазАвиаҚұтқару» АҚ-ның «Еврокоптер» тікұшағы тартылған еді. Тікұшақ бортында 7 адам болды. Бірақ, әуеден барлау арқылы іздеу еш нәтиже берген жоқ», – деп хабарлады департаменттің қоғаммен байланыс тобынан.
Құтқарушылар жоғалған жігітті жазық даладан, сай-жыралардан, қараусыз қалған қыстақтар мен өзге де жерлерден іздестірді. Бірақ, нәтиже болмағандықтан, іздеу жұмыстары тоқтатылды. Енді қайта жалғаса ма, жоқ па, әзірге белгісіз.