Барселонада 25 жастағы Ноэлья Кастильо өмірден өтті. Бірқатар ауыр оқиғаны бастан кешірген қыз сал болып қалып, эвтаназия жасау құқығына қол жеткізген еді. Оның оқиғасы қоғамда қызу талқыланып жатыр. Ноэлья Кастильоның ісі Испанияда эвтаназия, адам құқығы және моральдық таңдау төңірегіндегі дауды қайта ушықтырды. Ол биыл 26 наурызда қайтыс болды. Осы оқиғадан кейін "Исламда эвтаназияға неге рұқсат етілмейді?" деген сауал өршіді. Аqshamnews.kz тілшісі бұл сұрақтың жауабын іздеп көрді.
Исламда адам өмірі — Алланың аманаты. Сондықтан пенденің өз өмірін әдейі қиюына да, басқа біреудің өмірін тоқтатуына да рұқсат етілмейді. Құранда: "Өздеріңді өлтірмеңдер. Расында, Алла сендерге ерекше мейірімді" деп ескертіледі ("Бақара" сүресі, 195-аят). Осыған байланысты ислам ғалымдарының басым көпшілігі эвтаназияны шариғатқа қайшы деп бағалайды. Бұл туралы IslamQA жауабында да, SeekersGuidance түсіндірмесінде де ашық айтылған.
Ислам түсінігінде дерт пен сынақ адамды рухани тұрғыдан тазартып, сабырға шақыратын жағдай ретінде қарастырылады. Сол себепті қасақана өмірді тоқтату "жеңіл өлім" емес, Жаратушы белгілеген шектен шығу деп танылады. Адам жаны мен тәні оның толық меншігі емес, уақытша берілген аманат саналады. Бұл ұстаным ислам этикасында кеңінен көрініс тапқан.
Сонымен қатар, исламда белсенді эвтаназия мен үмітсіз науқасты аппараттан ажырату бір нәрсе емес. Қазақстандағы пәтуа сайтында жарияланған түсіндірмеде эвтаназияның өзі шариғат бойынша тыйым салынатыны, ал дәрігерлер кеңесінің шешімімен тірі қалуға үміті жоқ науқастан жасанды аппараттарды ажырату кей жағдайда рұқсат етілетіні айтылған. Мұны Fatua.kz сайтындағы пәтуадан оқуға болады. Халықаралық деңгейде де осыған ұқсас ұстаным International Islamic Fiqh Academy шешімдерінде көрініс тапқан.
ҚМДБ Шариғат және пәтуа бөлімінің үкімі:
1. Тыныс алуды жеңілдету үшін сұйықтықтарды шығаруға арналған аппараттарды ажыратуға болмайды.
2. Эвтаназия дегеніміз дәрігер науқастың өзінің немесе жанашырының келісімімен, болмаса дәрігердің өзі науқастың ауруы күшеюіне байланысты өмірін қию. Бұлай істеу шариғат бойынша тыйым салынған. Ол жазықсыз бір адамның жанын қиғанмен тең.
3. Дәрігерлердің кеңесінің (консилиум) шешімімен жасанды жолмен жүрек қағысын белгілі уақытқа дейін соғып тұруына арналған медициналық аппаратты тірі қалуға үміті жоқ науқастан ажыратуға рұқсат етіледі.
Сондықтан исламда эвтаназияға рұқсат етілмейді. Өйткені өмірді беру де, алу да - тек Алланың құзырындағы іс.