Алматыдағы Энрике Иглесиастың концертіне Қазақстанның әр өңірінен ғана емес, шетелден де жанкүйерлер жиналды, – деп хабарлайды aqshamnews.kz тілшісі.
Солардың бірі — Бакуден келген Акил. Ол Қазақстанға арнайы келіп, әншінің Астана мен Алматыдағы екі концертіне де қатысуды жоспарлаған.
«Мен Баку қаласынанмын, қазір Түркияның Анталия қаласынан келдім. Алматыға келгеніме өте қуаныштымын», — деді Акил.
Оның айтуынша, Энрике Иглесиастың концертіне алғаш рет 2011 жылы Мәскеуде барған. Ол кезде мектеп оқушысы болған.
«Ол кезде мектепте оқитынмын. Үлкен аренаға көп адам жиналды. Концерт өте жақсы өтті. Сол кезден қалған видеоларым әлі күнге дейін сақтаулы», — деп бөлісті ол.
Астанадағы концерттен кейін Акил Алматыға пойызбен жол тартқан. Екі қала арасындағы сапарға шамамен 17 сағат кеткен.
«Бүгінгі концертке арнайы пойызбен келдім. Астанадан Алматыға 17 сағатта жеттім. Меніңше, бұл оған тұрарлық», — деді жанкүйер.
Енді ол Алматыдағы кешті асыға күтіп, әншінің ең танымал туындыларын тыңдағысы келеді.
«Энрике Иглесиас өзінің ең танымал әндерін орындайды деп үміттенемін. Концертті хит әндерінен бастағанын қалаймын», — деді Акил.
Бакулық жанкүйер Энрике Иглесиастың концерттеріне 15 жылдан аса уақыт үзбей барып жүрген. Бұл жолы Қазақстанның екі бірдей қаласына келудің сәті түскен.