Бүгін Сенатта мәдениет, білім беру және тәлімгерлік мәселелері туралы заң қаралды.
Заңнамаға жетім және ата-анасының қамқорлығынсыз қалған балаларға арналған тәлімгерлік институтын реттеу үшін «тәлімгерлік жөніндегі ұйым» ұғымы енгізіледі, деп хабарлайды aqshamnews.kz.
Сенат спикері Мәулен Әшімбаев заңда дарынды оқушыларды мемлекеттік қолдау және олардың ғылыми қызметін ынталандыру үшін халықаралық ғылыми жобалар конкурстарының жеңімпаздары мен жүлдегерлеріне конкурстан тыс мемлекеттік білім гранттарын беру жөніндегі норма да бар екенін атап өтті.
«Болашақ» бағдарламасына бакалавриат дәрежесін қайтару туралы шешім қабылданды. Сонымен қатар халықаралық олимпиадалар мен конкурстарда жеңіске жеткен дарынды оқушыларға «Болашақ» бағдарламасы арқылы үздік шетелдік жоғары оқу орындарында білім алу мүмкіндігі қарастырылды. Мақұлданған заң тәлімгерлік институтының әлеуетін нығайтуға және тілімізді дамыту, білім беру жүйесін жетілдіру жөніндегі мемлекеттік саясаттың тиімділігін арттыруға оң ықпалын тигізеді деп сенеміз», деді Мәулен Әшімбаев.