10 шілдеде Түркі мәдениеті және мұрасы қорының штаб-пәтерінде Қор аппаратының басшысы Фахри Валеоғлу Гаджиевтің «Әзербайжан мен Грузия арасындағы қатынастар: дипломатиялық миссиялар қызметі тұрғысынан көзқарас (1918–1922 жж.)» атты кітабының тұсаукесері өтті.
Іс-шараның ашылуында сөз сөйлеген Қор президенті Ақтоты Райымқұлова қатысушыларды жылы қарсы алып, Түркі мәдениеті және мұрасы қорының соңғы жылдары жүзеге асырған маңызды жобалары, халықаралық серіктестік бағдарламалары және жаңа бастамалары туралы жан-жақты ақпарат берді.
Профессор Райымқұлова өз сөзінде аталмыш еңбектің тек тарихи зерттеу емес, сонымен бірге халықтар арасындағы мәдени байланыстарды нығайтатын маңызды қадам екенін атап өтті.
«Әзербайжан мен Грузия өзара құрмет пен стратегиялық әріптестік негізінде ғасырлар бойы қарым-қатынас орнатып келеді», – деді Қор басшысы.
Ол сонымен қатар екі ел арасындағы дипломатиялық қатынастардың тарихын зерделеу арқылы аймақтың ортақ мәдени және тарихи мұрасын тереңірек тануға жол ашылатынын айтты. Сөз соңында ол әзербайжандық дипломаттарды кәсіби мерекелерімен құттықтады.
Кітапқа жоғары баға берген қатысушылар қатарында — Халықаралық Түркі академиясының президенті, академик Шахин Мустафаев; Әзербайжан Республикасы Милли Мәжілісінің депутаты Ризван Набиев; Әзербайжан Ұлттық ғылым академиясы Тарих институтының директоры, кітаптың ғылыми редакторы, тарих ғылымдарының докторы, профессор Кәрім Шүкүров; Әзербайжан Республикасының Түрікменстандағы Төтенше және Өкілетті Елшісі Гисмят Гезалов; Сыртқы істер министрлігінің Кадрлар басқармасының басшысы Раман Мамедов; Қорғаныс министрлігінің өкілі Эльджан Имамвердиев; филология ғылымдарының докторы, профессор Бадирхан Ахмедли; тарих ғылымдарының докторы, профессор, еңбек сіңірген ғылым қайраткері Солмаз Тохиди-Рустамова және профессор Асиф Гаджилы болды.
Сөз сөйлегендер бұл монографияның әзербайжандық және жалпы түркі тарих ғылымына қосқан үлесі зор екенін ерекше атап өтті. Олар сондай-ақ Қор президенті Ақтоты Райымқұловаға әзербайжан дипломатиялық мұрасына көрсеткен қолдауы үшін алғыстарын білдірді. Бұл бағыттағы зерттеу жұмыстарын жалғастырудың маңыздылығы да баса айтылды.
Іс-шараға Әзербайжан Республикасында аккредиттелген дипломатиялық корпус өкілдері, мемлекеттік органдардың қызметкерлері, ғылым мен мәдениет қайраткерлері, қоғамдық-саяси сала өкілдері және БАҚ өкілдері қатысты.