Арменияда өткен Hype Fighting Asia турнирінің басты жекпе-жегінде қазақстандық файтер Еркебұлан Тоқтар қырғызстандық Марсель Нұрланбек уулуынан жеңіліп қалды, деп хабарлайды Aqshamnews.kz тілшісі.
Жекпе-жек ММА қолғаптарымен бокс ережесі бойынша ұйымдастырылып, толық қашықтыққа созылды. Үш раунд қорытындысы бойынша төрешілер бірауыздан жеңісті Марсель Нұрланбек уулуына берді. Осылайша, қазақстандық спортшының қатарынан жеті жеңістен тұрған сәтті сериясы тоқтады.
Айта кетейік, Еркебұлан Тоқтар мен Марсель Нұрланбек уулуы арасындағы кездесу алғашында 2025 жылдың ақпанында Nomad Fighting 12 турнирінде өтуі тиіс болған. Алайда ол кезде қырғызстандық файтер жекпе-жекке екі күн қалғанда кездесуден бас тартқан еді.
Еркебұлан Тоқтар поп-MMA арқылы танылып, кейін кәсіби ММА-ға ауысқан спортшы. Қазір оның кәсіби рекорды – 11 жеңіс, 3 жеңіліс. Сонымен қатар ол әлеуметтік желідегі танымалдығымен де ерекшеленіп жүр.