Абай облысындағы әйелдер колониясынан алаяқтығы үшін жазасын өтеген 26 жастағы әйел бостандыққа шықты. Оны мекеме қақпасынан Жетісу облысынан арнайы келген күйеуі қарсы алып, қос жұбайдың сағынысты сәті жүректерді тебірентті, - деп хабарлайды Aqshamnews.kz тілшісі.
Сот шешімімен бес жылға бас бостандығынан айыру жазасы тағайындалған әйел жазасын өтеу барысында асхана бөлімінде көмекші аспаз болып еңбек етіп, тәртіп пен жауапкершілік танытқан.
Жылдар бойы сағынысқан ерлі-зайыптылар қуаныштан көз жасын тыя алмай, ұзақ құшақтасып тұрып қалды. Бұл – тек бостандыққа шығу емес, ананың отбасы мен балаларына қайта оралуы, жаңа өмірдің басталуы еді.
Бостандыққа шыққан азаматша мекеме ұжымына алғысын білдіріп, жаңа бетбұрыс жасауға дайын екенін айтты.
"Мен үшін ең үлкен бақыт - жақындарымның жанымда болуы. Осы күнді талай күттім. Бұрын визажист болып жұмыс істедім, енді сүйікті ісіме қайта оралғым келеді. Түрме қабырғасында өткен жылдар ауыр, бірақ үлкен сабақ болды. Ендігі мақсатым - балаларым мен отбасым үшін жарық өмір құру", — деді ол.
Колония әкімшілігі де сотталған әйелдердің қоғамға бейімделуі әрдайым назарда екенін атап өтті.
"Біз жазасын өтеушілерді тек колонияда ғана емес, бостандыққа шығар алдында да қолдаймыз. Еңбек етуге, жаңа дағдылар алуға жағдай жасаймыз. Басты мақсат - олардың жаңа өмірге сеніммен қадам басуы және өткен қателіктерді қайталамауы", - деді №23 мекеме бастығының орынбасары Анар Сабиева.
Жас ана енді жаңа өмір парағын отбасымен бірге ашуға ниетті.