Мемлекеттік органдар мен әкімдіктерге әзірге латын графикасындағы маңдайша жазулар мен баннерлерді орналастырмау ұсынылды, – деп хабарлайды aqshamnews.kz тілшісі.
Бұл уақытша шектеудің себебін Ғылым және жоғары білім министрлігі түсіндірді.
Шектеу мемлекеттік те, жекеменшік те ұйымдарға қатысты. Оларға қазақ тілінің латын графикасына негізделген жаңа әліпбиі бекітілгенше күте тұру ұсынылды.
«Орталық мемлекеттік және жергілікті атқарушы органдарға әліпби жетілдірілген нұсқада бекітілгенге дейін меншік нысанына қарамастан барлық ұйымның латын графикасында көрнекі және өзге де ақпарат орналастыруын уақытша тоқтата тұру ұсынылды», – деп хабарлады ведомство «Курсив» сауалына.
Латын әліпбиіне көшу жұмыстары қай кезеңде
Министрліктің мәліметінше, қазір Тіл білімі институтының, «Тіл-Қазына» ұлттық ғылыми-практикалық орталығының және жоғары оқу орындарының ғалым-лингвистері қазақ тілінің латын графикасына негізделген әліпбиі мен емле ережелерінің жобасын жетілдіріп жатыр.
Бұған дейін қазақ әліпбиін латын графикасына көшіруге бөлінген қаражаттың басым бөлігі жұмыс жоспарларының өзгеруіне байланысты бюджетке қайтарылған болатын.
Сонымен қатар жаңа әліпби мен барлық нормативтік құжаттар ресми бекітілгеннен кейін ғана жоба мен цифрлық сервистерді дамытуға республикалық бюджеттен қосымша қаржы бөлінеді.