Кездесуге қор өкілдері, өңірлік үйлестірушілер, мобильді капитандар және байқаушылар қатысты, деп хабарлайды aqshamnews.kz тілшісі.
«Ел Дауысы» қоғамдық қоры 23 тамызда өтетін Құрылтай депутаттарының сайлауына қоғамдық бақылау жүргізуге дайындық аясында Алматыдағы байқаушылардың өңірлік тобымен кездесу өткізді.
Кездесуге қор өкілдері, өңірлік үйлестірушілер, мобильді капитандар және байқаушылар қатысты. Барлығы шамамен 30 адам жиналды. Сонымен қатар, осы уақытта тағы сегіз байқаушы қала бойынша өз маршруттарында үгіт материалдарының орналастырылуын бақылау жұмыстарын жалғастырды.
Кездесудің негізгі мақсаты – өңірдегі команданың дайындығын бағалау, сайлау алдындағы үгіт кезеңіндегі ағымдағы жұмысты және дауыс беру күніне тікелей дайындықтың ұйымдастырушылық мәселелерін талқылау.
Қатысушылар байқаушылар жұмысының бірыңғай алгоритмдерін, ықтимал заң бұзушылықтарды тіркеу тәртібін, өңірлік команданың қордың республикалық үйлестіру штабымен өзара іс-қимылын, сондай-ақ жергілікті жерде жұмыс барысында туындайтын практикалық мәселелерді талқылады.
Кездесу барысында байқаушыларға қажетті жұмыс материалдары: блокноттар, құжаттар, нұсқаулықтар және дауыс беру күні жұмыс істеуге арналған басқа да материалдар салынған жұмыс пакеттері табысталды.
Қалада электр қуатының өшірілуіне қарамастан, жоспарланған кездесу толық көлемде өткізілді.
Бағдарламаның жеке бөлігі ЕҚЫҰ өкілдерімен кездесу болды. Тараптар сайлау процесіндегі өзекті өзгерістерді, қоғамдық бақылаудың практикалық аспектілерін және алдағы дауыс беру күніне дайындыққа қатысты мәселелерді талқылады. Кездесуге бұқаралық ақпарат құралдарының өкілдері де қатысты.
«Біз үшін жұмысты тек орталықтан үйлестірумен шектелмей, өңірлік командалармен жеке кездесудің маңызы зор. Байқаушылар өз құқықтарын, міндеттерін және әртүрлі жағдайларда әрекет ету алгоритмін нақты білуі керек. Мұндай кездесулер жергілікті жердегі нақты дайындық деңгейін бағалауға және дауыс беру күні жұмыс істейтін адамдардан тікелей кері байланыс алуға мүмкіндік береді», – деді «Ел Дауысы» ҚҚ басшысы Аида Джексенова.
Анықтама: «Ел Дауысы» қоғамдық қоры 2020 жылдан бері сайлау процестеріне қоғамдық бақылау жүргізіп келеді. Құрылтай депутаттарының сайлауы – қор қоғамдық бақылауды ұйымдастыратын алтыншы сайлау науқаны. 2026 жылы қор командасының жұмысы Қазақстанның 20 қаласын қамтиды.
Өңірлік кездесулер «Ел Дауысы» ҚҚ-ның 2026 жылғы 23 тамызда өтетін Құрылтай депутаттарының сайлауына қоғамдық бақылау жүргізуге жалпы дайындық жұмыстарының бір бөлігі болып табылады.