Күнделікті белсенділікті көбейтудің ең оңай жолы - көбірек жаяу жүру. Олимпиадалық чемпионның ойлап тапқан әдісінің нәтижесі оң болып шықты. Джеффинг деген не? Оның денсаулыққа пайдасы қандай? Бұл туралы "Доктор Питер" басылымында айтылды, - деп хабарлайды Аqshamnews.kz тілшісі.
Джеффинг - жүгіру мен жүруді алмастырып отыратын жаттығу тәсілі. Оны олимпиадаға қатысқан желаяқ Джефф Гэллоуэй ұсынған. Бұл ерекше тәсіл жүгіру қашықтығын біртіндеп арттыруға, жарақаттан сақтануға және жаттығудан ләззат алуға көмектеседі.
Әдістің ерекшелігі - жүгіру мен жүруді кезекпен орындау. Екі минут жүгіріп, үш минут жаяу жүру, осылай бірнеше айналым жасап, толыққанды жаттығу құралады. Бұл тәсіл төзімділікті асықпай дамытады. Жаңадан бастағандар көбіне бірден қатты қарқын алып, қатты шаршап, кейін мүлде жүгіргісі келмей қалады. Ал жүгіру мен жүрісті үйлестіру ағзаны жүктемеге жұмсақ бейімдейді.
Жаттықтырушы Райли Бугхольцтың айтуынша, адам жүгірген сайын буындарға дене салмағынан үш-төрт есе көп күш түседі. Әсіресе жаңа бастағанда ағзаға мұндай әсерге бейімделуге уақыт керек. Джеффинг жарақат қаупін азайтып, өкпенің жұмысын күшейтуге, төзімділікті арттыруға және бұлшықетті нығайтуға көмектеседі.
Тағы бір психологиялық пайдасы бар: жүгіріп жүргенде қысқа демалыс жасағың келеді, бірақ "тоқтаған ұят" деген ой мазалайды. Джеффинг мұны да шешеді: сіз алдын ала белгілі бір уақыт жүгіріп, содан соң жоспарлы үзіліс жасайтыныңызды білесіз.