Алматы әкімі Дархан Сатыбалды жұмыс сапары барысында қаланың бірқатар маңызды нысанын аралап, жөндеу және жобалау жұмыстарының жай-күйімен танысты. Сонымен қатар ол қалалық инфрақұрылым мен қоғамдық кеңістіктерді дамытудың басым бағыттарын талқылады.
Жұмыс сапары Әуезов ауданы әкімдігінің аппаратынан басталды. Қазіргі уақытта бұл жерде әкімшілік ғимаратқа күрделі жөндеу жүргізіліп жатыр. Нысанды аралау кезінде әкімге құрылыс-монтаж және инженерлік жұмыстардың орындалу кезеңі, белгіленген мерзімнің сақталуы мен атқарылып жатқан жұмыстардың сапасы туралы ақпарат берілді. Ғимараттың ішкі жоспарлануын жетілдіруге, инженерлік желілерді жаңартуға, қызметкерлер мен келушілер үшін қолайлы жағдай жасауға, сондай-ақ мүмкіндігі шектеулі азаматтарға қолжетімді орта қалыптастыруға ерекше мән берілді.
Бұдан кейін қала әкімі Н. Сац атындағы балалар мен жасөспірімдер театрының қайта жаңғырту жұмыстарының барысымен танысты. Қарау барысында ғимараттың функционалдық мүмкіндіктері мен сәулеттік ерекшеліктерін сақтауға бағытталған құрылыс-монтаж жұмыстары мен техникалық шешімдер талқыланды. Қайта жаңғырту жұмыстарына жүйелі бақылау жүргізіп, орындалатын жұмыстың сапасына қойылатын талаптардың қатаң сақталуын қамтамасыз ету жөнінде нақты тапсырмалар берілді.
Жұмыс сапары Сайран көлі маңындағы аумақ пен Үлкен Алматы өзені арнасына іргелес жатқан учаскені аралаумен аяқталды. Көшпелі талқылау барысында аумақтың қазіргі жағдайы зерделенді. Қала әкімі бұл аумақты дамытуда кешенді тәсілдің қажеттігін атады. Атап айтқанда, жоспарлау шешімдерін біріздендіру, қоғамдық кеңістіктің біртұтас әрі логикалық құрылымын қалыптастыру, сондай-ақ тұрғындардың қауіпсіздігі мен жайлылығын қамтамасыз ету қажеттігіне назар аударылды.
