Ауданда салынып жатқан аумағы 3,2 гектар болатын жаңа саябақтың құрылысы аяқталуға жақын, – деп хабарлайды aqshamnews.kz тілшісі.
Алатау ауданын аралау барысында шаһар басшысы күрделі жөндеуден өткен «Алатау» дәстүрлі өнер театрына барды.
Мұнда ғимараттың қасбеті, концерт және кино залдары, әкімшілік бөлмелер жаңартылып, іргелес аумақ көркейтілді. Бүгінде театр репертуарында ұлттық өнерді дәріптеуге және мәдени мұраны сақтауға бағытталған түрлі жанрдағы 17 қойылым бар.
Сондай-ақ, аудан тұрғындарымен кездестім. Электр жарығының өшуі, жол жөндеу, әлеуметтік инфрақұрылымды дамыту мен өзге де жайттарды талқыладық. Оларды шешу бағытында жүйелі жұмыс жүргізіліп жатыр. Дегенмен кейбір жобалар созылып кеткен, ал кей жұмыстың сапасына қатысты ескертулер бар. Тұрғындар көтерген мәселелерді жан-жақты зерделеу үшін тиісті орындарға барып, әрқайсысының мән-жайын анықтаймын.
Бұған қоса, Нұркент шағынауданында салынып жатқан аумағы 3,2 гектар болатын жаңа саябақтың құрылыс барысын тексердім. Бұл тұрғындардың серуендеуіне, белсенді демалуына және бос уақытын тиімді өткізуіне арналған заманауи көркейтілген қоғамдық кеңістік болады. Қазір жұмыс аяқталуға жақын.