Дархан Сатыбалды абайтанушы ғалым Базарбек Атығайға Президенттің құттықтау хатын табыстады, - деп хабарлайды Аqshamnews.kz тілшісі.
Алматы әкімі Дархан Сатыбалды филология ғылымдарының кандидаты, абайтанушы ғалым Базарбек Атығайға Қазақстан Республикасының Президенті Қасым-Жомарт Кемелұлы Тоқаевтың құттықтау хатын табыс етті.
Мемлекет басшысы ғалымды ұлы Абайдың 180 жылдық мерейтойына орай жазылған ғылыми еңбектері үшін құттықтады. Солардың ішінде «Абайдың аударма мектебі» атты кітап бар. Онда «Абай мектебінің» көрнекті өкілдері Шәкәрім Құдайбердіұлы, Әсет Найманбайұлы, Уәйіс Шондыбайұлы, Тұрағұл Абайұлы, Даниял Исақов сынды кәсіби көркем аударманың қазақ тіліндегі негізін қалаған тұлғалардың көркем аудармаларына теориялық және текстологиялық талдау жасалған.
Сондай-ақ, құттықтау хатта ғалымның тұңғыш қазақ қаржыгері, ағартушы әрі аудармашы Даниял Исақовтың шығармалар жинағын жарыққа шығарғаны, сонымен қатар «Шейіт» атты салыстырмалы зерттеу еңбегін жазғаны атап өтілген. Бұл еңбекте автор естеліктерге, архив құжаттарына және мақалаларға сүйене отырып, Шәкәрім Құдайбердіұлының өмірінің соңғы кезеңіндегі оқиғаларды, оның ішінде қаза болуына қатысты жай-жапсарды зерделейді.
Қала әкімі ғалымға зор денсаулық, отбасына амандық, ісіне береке және шығармашылық табыс тіледі.