Қазір Чайковский көшесінің Қазыбек биден Әйтеке би көшесіне дейінгі бөлігі жаңартылып жатыр. Аумағы 0,6 гектар болатын бұл шағын кеңістікті ұзақ уақыт бойы ретсіз транзиттік аймақ ретінде пайдаланып келген. «Халық қатысатын бюджет» (ХҚБ) бағдарламасы аясында жергілікті тұрғындардың бастамасымен бұл аумақ енді демалыс пен серуендеуге арналған толыққанды қоғамдық кеңістікке айнала бастады. Алмалы ауданының әкімі ӨКҚ баспасөз турында осы инфрақұрылымды жаңғырту жұмысының барысы туралы айтты.
Нысандағы жұмыс биылғы 8 мамырда басталыпты. Жобаны қаладағы тығыз құрылыстың арасынан тұрғындарға қолайлы орта қалыптастыру үшін қолға алған. Аумақтың 0,4 гектарын көгалданады. Мұнда көгал төселіп, кеңістікті аймақтарға бөлу үшін көпжылдық бұталар егіліп жатыр. Бұған дейін болмаған автоматты суару жүйесі де орнатылмақшы енді.
0,2 гектар аумақта жаңа қатты жабын төселіп жатыр. Мердігер ұйым 985 шаршы метр сапалы тас төсеме мен 250 шаршы метр асфальт жабындысын төсейді. Жаздың аптап ыстығынан қорғану үшін көлеңкелік шатыр мен пергола орнатылады. Қараңғы аумақтарды жою мақсатында 400 метр кабель тартылып, 27 жаңа жарық бағанасы да орнатылады.
Жаңарған қоғамдық кеңістікті жергілікті тұрғындар қазірдің өзінде жоғары бағалап отыр. Қазыбек би көшесі, 85-үйдің тұрғыны Жанат Пүлібайқызы Ізжанованың айтуынша, абаттандырудан кейін аумақ тұрғындардың демалысы мен серуендеуіне әлдеқайда жайлы бола түскен.
«Біздің аула тұрғындардың сүйікті орны болатын, енді тіпті көркейіп кетті. Автоматты суару жүйесі орнатылды, ыңғайлы орындықтар қойылды, спорт пен балалар алаңы жаңарды. Абаттандырудың арқасында жер нағыз саябаққа айналғандай әсер қалдырады. Көп рақмет сіздерге!», – деді Жанат Ізжанова.
«Чайковский көшесі сияқты шағын аумақты абаттандыру жарықтың жетіспеуі, бүлінген тротуар мен жасыл желекті суару сияқты тұрғындардың күнделікті мәселесін шешуге сеп болмақ. Біз бос транзиттік аймақтардан бас тартып, адамдар көлеңкеде отырып тыныға алатын функционалды қоғамдық кеңістік қалыптастырып жатырмыз. Бұл – өз ауласы мен көшенің таза, жайлы болғанын қалайтын тұрғындардың нақты сұранысына берілген жауап», – дейді Алмалы ауданының әкімі Арман Шамшин.