25 тамызда «Татар-информ» ақпарат агенттігінде Абай атындағы Қазақ ұлттық опера және балет театрының гастрольдері мен Хамит Шанғалиевтің «Хан Сұлтан. Алтын Орда» операсының премьерасына арналған баспасөз конференциясы өтті.
26 тамыз күні Мұса Жәлел атындағы Татар мемлекеттік академиялық опера және балет театрының сахнасында Абай атындағы Қазақ ұлттық опера және балет театрының гастрольдік бағдарламасы аясында Хамит Шанғалиевтің «Хан Сұлтан. Алтын Орда» операсының премьерасы ұсынылады.
Гастрольдер Қазақстан Республикасы Конституциясының 30 жылдығына орайластырылып, Қазақстан Республикасының Мәдениет және ақпарат министрлігінің, Татарстан Республикасы Мәдениет министрлігінің және Қазақстан Республикасының Татарстандағы Бас консулдығының қолдауымен өтуде.
Операның негізгі оқиғасы — Алтын Орданың құрылу кезеңі. Басты кейіпкер — Хан Сұлтан, Жошы ханның үшінші жары, ұлы хан Беркенің анасы. Ол өзінің ақыл-парасаты, мінезі мен саяси көрегендігі арқасында Алтын Орда тарихында маңызды орын алып, өз ұлдарын Жошы Ұлысының ірі мемлекет қайраткерлеріне айналдырды.
Алтын Орданың тарихи мұрасы — түркі халықтарын біріктіретін рухани қазына. Осыған байланысты қойылымға түркітілдес елдердің ғылыми орталықтары мен ғалымдары үлкен үлес қосты. Ғылыми кеңесшілер қатарында: Алтын Орда және татар хандары зерттеу орталығының жетекшісі Ильнур Миргалиев, Ыстамбұлдағы Мармара университетінің профессоры Ильяс Кемалоғлу және тарих ғылымдарының кандидаты Нұрлан Атығаев болды.
Жобаның авторы — Айнұр Көпбасарова. «Хан Сұлтан» операсы драматург Алмас Нүсіптің шығармасы негізінде жазылып, Маралтай Ыбыраевтың сахналық нұсқасында ұсынылды.
Операның режиссері — Давиде Ливерморе (Италия). Ол Luciano Pavarotti, Plácido Domingo, José Carreras, Mirella Freni, Zubin Mehta сынды әлемге әйгілі орындаушылармен және Luca Ronconi, Андрей Тарковский, Чжан Имоу секілді режиссерлермен жұмыс істеген. Ливерморе Миландағы La Scala, Рим операсы, Туриндегі Teatro Regio, Генуядағы Carlo Felice сияқты Еуропаның ең беделді сахналарында спектакль қойған.
Қоюшы-дирижер — Қазақстанның еңбек сіңірген қайраткері Нұржан Байбусинов, ол Абай атындағы ҚазҰТОБ-тың бас дирижері әрі Мұса Жәлел атындағы Татар мемлекеттік академиялық опера және балет театрының дирижері болып табылады.
Қойылым классикалық опера бола тұра, заманауи технологияларды кеңінен қолданады. Жылдам дамып жатқан заманауи дәуірге сай видеоконтент те ерекше қолданылады. Өмір символы саналатын «тополь бұтағы» сахнада ерекше шешіммен көрініс тауып, көрерменге терең әсер қалдырады.
Абай атындағы Қазақ ұлттық опера және балет театры үшін бұл — Татарстандағы алғашқы гастроль. Қысқа уақыттың ішінде барлық 999 билет толықтай сатылып, АНШЛАГ болды.