2024 жылғы 7-14 шілде аралығында Астанада IBO-2024 биологиядан 35-ші Халықаралық олимпиада өтеді. Бұл оқушылар арасындағы ең беделді олимпиадалардың бірі.
Биыл оған әлемнің әр түкпірінен ең мықты 305 жас биолог қатысады, деп хабарлайды Almaty-akshamy.kz Оқу-ағарту министрлігіне сілтеме жасап.
Еліміздің құрама командасына олимпиадалық резерв арасында ең жоғары рейтингке ие болған төрт оқушы мен екі жетекші кірді:
- Ғалымжан Бақтыбай - «Білім-Инновация» дарынды балаларға арналған лицей-интернатының 11 сынып оқушысы. Жалпы білім беретін пәндер бойынша республикалық олимпиаданың үш алтын, IBO-2023 олимпиадасының қола медалінің, Авиценна атындағы Халықаралық олимпиаданың күміс медалінің иегері;
- Амина Тынырбай - №10 дарынды балаларға арналған «Білім-Инновация» Қызылорда облыстық лицей-интернатының 11 сынып оқушысы. 2024 жылғы жалпы білім беретін пәндер бойынша республикалық олимпиаданың алтын медалінің, National Brain Bee республикалық олимпиадасының қола медалінің, Авиценна атындағы Халықаралық олимпиаданың күміс медалінің иегері;
- Нұртөре Төреханұлы - Шығыс Қазақстан облыстық дарынды балаларға арналған «Білім-Инновация» мамандандырылған лицейінің 11 сынып оқушысы. National Brain Bee республикалық олимпиадасында алтын медаль, International Mendel'S Biology Olympiad-2023 олимпиадасында алтын медаль, 2024 жылғы жалпы білім беретін пәндер бойынша республикалық олимпиадада алтын медаль иегері;
- Диас Сүлейменов - Ақтөбе облыстық «Білім-Инновация» лицей-интернатының 11 сынып оқушысы. Жалпы білім беретін пәндер бойынша республикалық олимпиаданың екі мәрте алтын медалінің иегері, International Mendel'S Biology Olympiad-2022-де алтын медаль, Авиценна атындағы Халықаралық Олимпиадада қола жүлдегер иегері.
Жетекшілері: Бауыржан Смайлов - биотехнология магистрі, IBO-2007 халықаралық олимпиадасының қола жүлдегері; Ернар Батыржанов – Ульсан Ұлттық Ғылым және технологиялар институтының (UNIST, Корея) студенті, биология бойынша халықаралық және республикалық олимпиаданың жеңімпазы.
Анықтама: Олимпиада теориялық және 4 практикалық турдан тұрады (биохимия, молекулалық биология, биоинформатика, анатомия және жануарлар физиологиясы). IBO-ға Қазақстан құрама командасы 1996 жылдан бері қатысып келеді. Осы жылдар ішінде ел құрамасы 2 алтын, 20 күміс, 54 қола медаль, 14 грамота жеңіп алды. Еліміздің қоржынында 90 марапат бар.