Астанадағы қалалық психикалық денсаулық орталығында ер адам қабылдау бөлімінің фельдшеріне шабуыл жасап, медицина қызметкері бас-ми жарақатын алды, – деп хабарлайды aqshamnews.kz тілшісі.
Астанада қалалық психикалық денсаулық орталығына келген ер адам қабылдау бөлімінде жұмыс істейтін фельдшерге шабуыл жасады.
Оқиға 3 сәуір күні болған. Мәліметке сәйкес, ер адам ауруханаға жатқызылған туысымен шұғыл түрде кездестіруді талап еткен. Алайда ол өзі туралы мәлімет беруден бас тартқан.
Кезекші фельдшер оны белгіленген қабылдау уақытымен келуге шақырған. Осыдан кейін ер адам медицина қызметкеріне күш қолданып, оқиға орнынан қашып кеткен.
Салдарынан фельдшер бас-ми жарақатын алып, денесінің түрлі жерінен соққы алған.
Көп ұзамай шабуыл жасаған 47 жастағы Астана тұрғыны полиция тарапынан ұсталды. Оған қатысты қылмыстық іс қозғалды.
Астана қалалық полиция департаментінің мәліметінше, бұл дерек бойынша медицина қызметкеріне қызметтік міндетін атқару кезінде күш қолдану фактісімен Қылмыстық кодекстің 380-3-бабы бойынша тергеу басталған.
Полиция күдіктіге қатысты бұлтартпау шарасын таңдау мәселесі қаралып жатқанын хабарлады.
Сондай-ақ ведомство жедел қызмет өкілдеріне қарсы кез келген агрессия мен қорқыту әрекеті қатаң түрде тоқтатылатынын ескертті.