Алматы қаласы бойынша ҚАЖ департаментіне қарасты №11 мекемесіне, яғни кәмелетке толмаған жазасын өтеуші балалар колониясында мегаполисте орналасқан Д.А.Қонаев музей-үйінің экскурсоводы Ардақ Әбжаппаров жылжымалы көрме ұйымдастырды.
Көрмеде Д.Қонаевтың өмірі мен қызметі, еңбек жолы, игі истері мен жетістіктері туралы қызықты мәліметтер әңгімелеп берді.
Қазақстанның өсіп-өркендеу жолында елеулі ізі, қолтаңбасы қалған бірегей тұлға – Дінмұхамед Қонаев тұтынған заттарды, ерекше бұйымдарын қолмен ұстап, қызықтап көрген жасөспірімдер тарапынан сауалдар да аз болмады. Арман есімді тәрбиеленуші өзінің музейге барып келгендей сезімде болғанын жасырмады.
«Біздің мақсат – жазалы жасөспірімдер арасында осындай жүздесулерді жиі ұйымдастырып, оларға өмірдің мәнін түсіндіру, жақсы адамдардың, тұлғалардың жүріп өткен жолын насихаттау, дәріптеу арқылы жақсы күндерден күдер үзбеуіне дәнекер болу», – дейді №11 мекеме бастығы әділет полковнигі Алмат Сүлейменов.