2025 жылғы 12 желтоқсанда Алматы қаласы Білім басқармасының «№187 жалпы білім беретін мектеп» КММ-де көрнекті ақын, жазушы, ҚР мәдениет саласының майталманы Сәуле Досжанның «Бала шақтан – болашаққа» атты жаңа ғұмырнамалық-танымдық повесінің салтанатты таныстырылымы өтті.
Шығарма – еліміздің Президенті Қасым-Жомарт Кемелұлы Тоқаевтың балалық кезеңі мен тұлға болып қалыптасу жолына арналған.
Іс-шарада Мемлекет басшысының ұлт көшбасшысы деңгейіне дейінгі дара жолына әсер еткен отбасы тәрбиесі, рухани құндылықтары мен адамдық ұстанымдары туралы тағылымды ойлар талқыланды.
Сондай-ақ қазақ детектив жанрының негізін қалаған Кемел Тоқаевтың ұлағатты тәрбиесі мен өнегесі туралы ерекше пікірлер айтылды. Іс-шараға танымал қаламгерлер, мектеп парламентінің өкілдері мен аға тәлімгерлер және ата-аналар қауымы қатысты.
Оқушылар автор Сәуле Досжанмен еркін форматта сұхбат құрып, Президенттің балалық шағынан алынған өмірлік сабақтар мен шығарманың тәрбиелік мазмұнын талқылады. Сонымен қатар жас буынның әдебиетке қызығушылығын арттыруға арналған арнайы диалог алаңы ұйымдастырылды.
Шара жас ұрпақты отансүйгіштікке, табандылыққа, білімге құштарлыққа және азаматтық жауапкершілікке баулуды мақсат етті. Повесть арқылы оқушылар әрбір үлкен жетістіктің түп тамыры бала күннен басталатын еңбек, ынта және адалдық екенін сезінді.