Алматы қаласының Әуезов ауданының әкімі Абзал Егембердиев ауданда жүзеге асырылып жатқан әлеуметтік саладағы ауқымды жобалар туралы хабарлады.
«Сапалы әлеуметтік инфрақұрылымды дамыту — ерекше бақылауда. Халық санының өсуін ескере отырып, мектеп орындарының тапшылығы мен балабақшалардың қолжетімділігін жүйелі түрде шешіп келеміз», — деді Абзал Егембердиев Алматы өңірлік коммуникациялар қызметінің баспасөз конференциясында.
Бүгінде ауданда 5 мың мектеп орнына тапшылық байқалады. Бұл мәселені шешу мақсатында былтыр қыркүйекте апатты жағдайда болған №97 мектеп ғимаратының орнына 600 орындық жаңа мектеп салынды. Жобаның құны — 5,8 млрд теңге. Сондай-ақ, қараша айында №9 мектепке 1 200 орынға арналған сейсмикалық күшейтілген күрделі жөндеу жүргізілді (1,9 млрд тг). Қазіргі уақытта №13, №72 және №158 мектептерінің жаңа ғимараттарын салу, сондай-ақ №42 мектепке 300 орындық және №1 мектепке 400 орындық қосымша ғимараттар салу бойынша жобалық-сметалық құжаттама әзірленіп жатыр.
«Балабақша орындарының тапшылығын азайту — ең басым бағыттардың бірі. Қазіргі таңда бізге 6 мыңнан астам орын жетіспейді», — деді аудан әкімі.
2025 жылдың тамызына дейін 10-шағын ауданда 160 орындық (1,6 млрд тг) және «Алтын бесік» шағын ауданында 120 орындық (1 млрд тг) екі жаңа балабақша пайдалануға беріледі. Сонымен қатар, осы жылы мемлекеттік сараптаманың қорытындысынан кейін Таугүл шағын ауданындағы апатты ғимараттың орнына 120 орындық балабақша құрылысының басталуы жоспарланып отыр.
2025 жылдың наурызынан бастап Н.Сац атындағы Мемлекеттік академиялық орыс балалар мен жасөспірімдер театрының реконструкциясы жүргізілуде. Жобаның жалпы құны — 23,9 млрд теңге. Жобаны «BI Urban Construction» ЖШС жүзеге асыруда. Құрылыс жұмыстары келесі жылдың маусым айында аяқталады деп жоспарланған.
Медициналық салаға келсек, аудан әкімі хабарлағандай, ақпан айында Жетысу-3 шағын ауданында ерекше қажеттіліктері бар балаларды оңалтуға көмектесетін «Парасат» әлеуметтік қызмет көрсету орталығы ашылды (ауданы 1760 м²), сондай-ақ, сәуірде Таугүл-3 шағын ауданындағы №18 емхана күрделі жөндеуден өтті. Жыл соңына дейін №16 емхананың күрделі жөндеуін аяқтау жоспарланып жатыр.
Сонымен қатар, «Қуаныш» шағын ауданында ауысымына 300 адам қабылдай алатын жаңа емхананың жобасы әзірленіп жатыр.