Атырау облысында сот жергілікті тұрғынға қатысты қылмыстық істі қарап, оны 7 жасар қызды зорлап, әдейі өлтіргені үшін айыпты деп танып, өмір бойына бас бостандығынан айыру жазасын тағайындады, деп хабарлайды Aqshamnews.kz тілшісі соттың баспасөз қызметіне сілтеме жасап.
Қылмыс 2025 жылдың маусымында Құлсары қаласында болған. Сот анықтамасына сәйкес, өзен жағалауында серуендеп жүрген 7 жастағы қыз үйіне қайтар жолда адасып, мас күйдегі бейтаныс ер адамға жолыққан. Күдікті «жол көрсетемін» деп алдап, баланы өзен жағасына апарып, оның дәрменсіздігін пайдаланып, зорлық көрсеткен. Қылмысты жасыру үшін ол баланы ұрып, кейін суға батырып жіберген.
Кінә дәлелдерін куәгерлердің айғақтары, оқиға орнын қарау хаттамасы, бейнежазбалар және сараптамалар қорытындылары растады. Видеожазбалардың бірінде ер адамның баланы ертіп кетіп бара жатқаны көрінеді.
