Астанада полиция қызметкерлері жол қозғалысы ережесін өрескел бұзған Tesla көлігін тоқтатты. Көлік тізгінінде 14 жастағы жасөспірім отырғаны анықталды, – деп хабарлайды aqshamnews.kz тілшісі.
Онымен бірге көлікте тағы бір кәмелетке толмаған досы отырған.
Полиция мәліметінше, құқықбұзушылықтар Жедел басқару орталығының бейнебақылау камералары арқылы тіркелген. Қызметкерлердің тоқтау туралы заңды талабына жасөспірім бағынбай, оқиға орнынан қашып кетуге әрекеттенген.
Ведомство бұл жағдайдың бірінші рет емес екенін атап өтті. Бұған дейін, наурыз айында, дәл осы көлікпен жасалған бірнеше құқықбұзушылық, соның ішінде қауіпті маневрлер де тіркелген. Алайда бұрын қабылданған шаралар нәтиже бермеген.
Қазіргі уақытта Tesla коммуналдық тұраққа қойылды. Оқиғаға байланысты көлік жүргізу құқығы жоқ адамның басқаруы және көлікті сондай адамға беру фактілері бойынша әкімшілік хаттамалар рәсімделді.
Сонымен қатар жасөспірімнің заңды өкілдері де жауапкершілікке тартылды. Оларға бала тәрбиесі мен қауіпсіздігін қамтамасыз ету міндеттерін тиісінше орындамағаны үшін шара қолданылған.
Полиция жүргізуші куәлігінсіз көлік басқару, әсіресе кәмелетке толмағандардың рөлге отыруы адам өмірі мен денсаулығына тікелей қауіп төндіретінін ескертті.