Астанада ер адам әйелді көлігінің жүксалғышында тасымалдағаны үшін әкімшілік жазаға тартылып, уақытша ұстау изоляторына қамалды, деп хабарлайды Аqshamnews.kz. Бұл оқиғаға байланысты бейнежазба әлеуметтік желіде тарады.
Видеода ер адамның көлік жүк салғышында жатқан әйелмен сөйлесіп тұрғаны, кейіннен жүксалғышты жауып, көлікке мініп кеткені көрінеді.
"Аулада ұрысып тұрды, әйел жүксалғышқа өзі мініп алған", – делінген видеоның астында.
Оқиға 14 шілдеде Астананың Сарыарқа ауданында болған. Қалалық полиция департаментінің хабарлауынша, құқықбұзушы анықталып, әкімшілік жауапкершілікке тартылған.
"Осы құқықбұзушылықты жасағаны үшін сот әкімшілік жаза тағайындады. Қазір құқықбұзушы Астана қалалық полиция департаментінің әкімшілік қамауға алынған тұлғаларға арналған арнайы уақытша ұстау изоляторына қамалды", – делінген Сарыарқа аудандық полиция бөлімінің хабарламасында.