Ұлттық ұланның әскери қызметшілері алғашқылардың бірі болып дауыс беруге кірісті. Бұл туралы ҚР ІІМ Ұлттық ұланының баспасөз қызметі мәлімдеді, деп хабарлайды aqshamnews.kz
АЭС құрылысы бойынша референдумда ең алғашқы болып ҚР ІІМ Ұлттық ұланының әскери қызметшілері өз таңдауларын жасады. Референдум учаскелері таңғы сағат 06:00-де жұмысын бастады, бұл учаскелердегі ерекше тәртіпке байланысты.
Атап айтқанда, 5573 және 6505 әскери бөлімдерінің шамамен 2000-ға жуық әскери қызметшісі референдумға қатысты. Дауыс беру учаскелерінде дауыс берушілердің лайықты таңдау жасауына барлық жағдай жасалған. Бірінші болып дауыс бергендердің арасында ҚР Ішкі істер министрінің орынбасары – Ұлттық ұланның Бас қолбасшысы генерал-майор Аңсаған Балтабеков те бар.