М.О. Әуезов атындағы Әдебиет және өнер институтының 90 жылдық мерейтойына орай Астана қаласындағы күндері аясында Институт ғалымдары Қазақ ұлттық хореография академиясының ұжымымен әріптестік кездесу өткізді.
Әріптестік кездесу-сұхбатта Институт бас директорының ғылым жөніндегі орынбасары, филология ғылымдарының кандидаты Қалиева Альмира Қайыртайқызы, Институттың жетекші ғылыми қызметкері, өнертану кандидаты Мұқан Аманкелді Оразбайұлы, ғалым хатшы, Phd Кенджакулова Айнұр Берікқызы сондай-ақ, Қазақ ұлттық хореография академиясының «Өнертану және арт-менеджмент» кафедрасының профессоры филология ғылымдарының докторы Толысбаева Жанна Жеңісқызы, өнертану кандидаты, профессор Жұмасейітова Гүлнәр Тазабекқызы және оқытушы-профессорлық құрамы мен Phd докторанттар, магистранттар қатысты.
Кездесу барысында Институттың 90 жылдық тарихы мен ғылыми-зерттеу жұмысы жөнінде ақпарат беріліп, соңғы бес жылда жарық көрген ғылыми еңбектер таныстырылды. Атап айтқанда, «Бейнелеу өнері» бөлімінің меңгерушісі, өнертану кандидаты, доцент Шарипова Диляра Сафарғалиқызының жетекшілігімен жарық көрген «Мәңгілік Ел» мәдени парадигмасы мен Қазақстан өнерінің жаһандануы», «Культурная память как духовный ресурс национальной идеи «Мәңгілік ел» в современном изобразительном искусстве и архитектуре Казахстана», «Қазақстанның рухани жаңғыру контекстіндегі бейнелеу өнері» ұжымдық монографиялары, «Театр және кино» бөлімінде, өнертану кандидаты Мұқан Аманкелді Оразбайұлының басшылығымен шыққан «Жастардың ұлттық сана-сезімін қалыптастырудағы көркемөнердің рөлі», «Заманауи театр және кино өнеріндегі мәдени мұраның сақталуы мен трансформациялануы» атты ғылыми еңбектері таныстырылды.
Сондай-ақ, әріптестік кездесуде екі мекеме өкілдері өзара ынтымақтастық келісімшартын қайта пысықтап, ғылыми және мәдени шығармашылықты нығайтуға байланысты бірлесіп жұмыс жасау жоспарларымен бөлісті.