Ақтөбе облысында қатты боран мен қалың қардың салдарынан жолда қалған 68 шетел азаматы құтқарылды, деп хабарлайды Aqshamnews.kz тілшісі.
Облыс әкімдігінің мәліметінше, Әйтеке би ауданы маңындағы тасжолда техникалық ақауға байланысты жолаушылар автобусы қар құрсауында қалған. Автобуста 57 адам, оның ішінде 3 бала болған. Құтқарушылар Мәскеуден Тәжікстан Республикасына бағыт алған автобустағы барлық жолаушыны қауіпсіз жерге эвакуациялаған. Олардың барлығы – Тәжікстан азаматтары.
Жолаушылар уақытша Қарабұтақ ауылы мешітіндегі жылыту пунктіне орналастырылды. Медициналық көмекке мұқтаждық болмаған.
Бұл – өңірдегі жалғыз жағдай емес. Сол күні Қарғалы ауданында «Жосалы – Ашылысай» тасжолында екі көлік жолда қалып, ішінде Өзбекстанның 11 азаматы болғаны анықталды. Олар Ташкенттен Мәскеуге бағыт алған. Көліктер сүйретіліп, жолаушылар Жосалы ауылындағы базаға жеткізілді. Оларға да медициналық көмек қажет болмады.
Төтенше жағдайлар министрлігі қолайсыз ауа райы кезінде алыс жолға шықпауға және қозғалыс шектеулері туралы ресми ақпаратты қадағалап отыруға шақырды.