Ақтөбе облысында полицейлер хабар-ошарсыз кеткен тұрғынға қатысты ауыр қылмысты ашты, - деп хабарлайды aqshamnews.kz Polisia.kz сайтына сілтеме жасап.
2024 жылғы 11 қазанда Хромтау қаласының тұрғыны полицияға хабарласып, жұбайының бір аптаға жуық уақыттан бері үйіне оралмағанын және байланысқа шықпай жүргенін айтқан.
Оқиғадан кейін жедел-тергеу тобы құрылып, іздестіру жұмыстары басталды. Полицейлер жоғалған азаматтың туыстарынан, таныстарынан, көршілері мен әріптестерінен жауап алып, оның баруы мүмкін орындарды тексерген.
Жедел-іздестіру шаралары барысында полиция жоғалған адамның екі танысын анықтады. Күдіктілердің бірінің үйін тінту кезінде тоңазытқыштан марқұмның басы мен дене мүшелері табылған. Ал денесінің қалған бөліктері қала сыртынан табылғаны хабарланды.
Тергеу мәліметінше, бұлтартпас дәлелдер ұсынылғаннан кейін күдіктілер қылмыс жасағандарын мойындаған.
Қылмыстық іс толық тергеліп, сотқа жолданды. 2025 жылғы ақпанда сот үкімі шықты.
Негізгі айыпталушы адам өлтіргені үшін 11 жылға бас бостандығынан айырылды. Ал екінші сотталушы аса ауыр қылмысты жасырғаны үшін 4 жылға сотталды.
Полиция адамның хабар-ошарсыз кеткені туралы әрбір өтініш дереу тіркеліп, тексерілетінін еске салды.