2026 жылғы футболдан әлем чемпионатының үшінші орын үшін өткен матчында Англия құрамасы Францияны 6:4 есебімен жеңіп, турнирдің қола жүлдегері атанды, – деп хабарлайды aqshamnews.kz тілшісі.
Кездесу ағылшындардың қарқынды шабуылымен басталды. Матчтың 3-минутында Деклан Райс алыстан дәл соққы жасап, есеп ашты. Арада 15 минут өткенде Райстың бұрыштамадан асырған пасын Эзри Конса голға айналдырып, есепті 2:0-ге жеткізді.
38-минутта Букайо Сака үшінші голды соқса, бірінші таймға қосылған уақытта ол дубль авторы атанып, Англия үзіліске 4:0 есебімен басымдықпен кетті.
Екінші таймда Франция таразы басын теңестіруге барын салды. Алдымен Килиан Мбаппе есеп айырмасын қысқартса, кейін Брэдли Барколя мергендік танытты. 66-минутта Мбаппе тағы бір гол соғып, есепті 4:3-ке жеткізді.
Осы голдан кейін Мбаппе биылғы әлем чемпионатындағы 10-голын соғып, турнирдің үздік сұрмергені атанды. Сондай-ақ ол әлем чемпионаттарының финалдық кезеңдеріндегі гол саны бойынша Лионель Мессиден озып, рекорд орнатты. Француз шабуылшысының еншісінде – 22 гол, ал Мессиде – 21.
Матчтың 87-минутында Букайо Сака пенальтиден мүлт кетпей, хет-трик рәсімдеді. Қосымша уақытта Усман Дембеле француздардың төртінші голын соққанымен, араға екі минут салып Джуд Беллингем қарсы шабуылды сәтті аяқтап, ойынның нүктесін қойды.
Осылайша Англия құрамасы 6:4 есебімен жеңіске жетіп, әлем чемпионатының қола медалін жеңіп алды. Ал Франция турнирді төртінші орынмен аяқтады.
Айта кетейік, әлем чемпионатының финалы 19 шілдеден 20 шілдеге қараған түні Қазақстан уақытымен сағат 00:00-де өтеді. Бас жүлде үшін Аргентина мен Испания құрамалары кездеседі.